小甜甜單爭產案，暫時無乜新進展，爭產雙方暫時「你有你忙碌，我有我生活」，好似陳生咁，近日忙於加強自己屋企保安之外，佢名下做飛機生意個間BAAJet都好多搞作。
郭太不妨搵陳生租飛機
上個月先話2009同2011年加多兩架空中巴士，呢頭又宣佈獲糖王郭鶴年旗下檔嘉里，將兩架灣流G200型飛機嘅公務管理協議判畀BAA，令BAA嘅包租機隊進一步擴大。
至於糖王點解會畀生意陳生做，BAA話，主要係因為佢哋有經驗豐富嘅管理層，而佢哋響中國獨特的營運方式，能為機主慳成本亦係原因……寫就梗係咁寫啦，唔通話因為大家好熟咩！
新地郭炳聯太太郭劉寶賜因為唔肯將手袋放喺行李架而上《蘋果》A1，下次不妨諗吓搵小甜甜嘅好朋友陳振聰幫手，向佢旗下間BAAJet租架私人飛機，咁咪可以自訂規矩，手袋擺邊都得囉。