徐熙媛（大S）第三年做天梭錶代言人，佢噚日一身女王打扮喺中環出席「PRC100Diamonds璀璨鑽石腕錶」記者會，一出場仲同男模大跳華爾滋。大會送咗隻最新款PRC100Diamonds手錶畀大S，價值$9800，今次第三年續約，酬勞當然又加唔少，不過大S話人工只夠喺高雄買層樓，因為台北樓貴，除非可以再續多一年合約啦！大S又好坦白咁話，佢簽約目的唔係為買樓，而係為咗錶，仲可以益埋男朋友周渝民（仔仔）。
早排有傳大S同仔仔分手，不過大S提起仔仔笑晒口個冧樣，睇嚟分手係流料。大S噚日扮女王，問佢仔仔咪係王子？估唔到大S好清醒咁話：「應該是國王，不過他比較似王子，太孩子氣，我是queen，他就是king囉！」認真肉麻。
幫朱孝天守秘密
大S自爆仔仔不愛說肉麻情話，佢話如果想令佢感動，其實好簡單，只要送心意卡就得，佢話：「現在的男生都不浪漫，仔仔平時也不寫，只有生日才寫過一次，我們現在也不講肉麻話，我愛聽他也不講，已經過了熱戀期，現在是進入正常期。」
最近朱孝天同林熙蕾被發現同居，大S話：「我有和朱孝天保持聯絡，但他沒說感情事，就是有我也不會跟你們談啦！」
