以往出現股災，政府方面通常由馬時亨發言評論，叫股民要量力而為，做好風險管理等等；噚日股災再現，適值馬局長出現於滬港服務業會議，記者當然唔放過佢，追問對股災睇法，不過今次佢就不作任何評論。
皆因頂官帽變咗，肥馬由以往財經事務及庫務局局長變咗做商務及經濟發展局局長，因為不在其位，佢叫記者搵新晉靚仔局長陳家強回應。
至於屬佢自己嗰瓣就願講多幾句，肥馬話，自上周商務部宣佈新加工貿易政策後，政府已經成立咗專責小組，由商務及經濟發展局常任秘書長蔡瑩璧做召集人，成員包括政府嘅發展局，以及生產力促進局同業界等18個成員，將於明日開會商討對策，為業界提供長中短期協助。
喺同一場合，上海浦東新區區長張學兵宣佈，上海浦東區建立CEPA綠色通道，統一受理港商CEPA嘅申請，加快審批，以及提供諮詢指導工作。睇來兩地商貿活動只會越來越頻繁。