股路縱橫︰大跌意料中事 執平貨機會快到 - 郭兆誠

股路縱橫︰大跌意料中事 執平貨機會快到 - 郭兆誠

港股噚日又再大跌,距離趁低執平貨的日子已越來越近。
噚日個跌市好誇張,最低之時,恒指大跌974點,期指更跌超過1000點,其實,中期調整開始,大市繼續尋底係意料中事,只不過估唔到一日會跌咁多,恒指收市22455,大跌729點,期指尾段再大插,收22320,低水135點。
大市前兩日反彈,最高上番23200,完全補回上周五的下跌裂口(23128至22855)後,又再急挫,而且仲跌穿上周五的低位。只係短短5個交易日,港股直情係兩個世界,上周四,大市仲係氣勢如虹,恒指創出23558的歷史新高,但唔使一個禮拜,以噚日低位22209計,足足跌咗1340多點。大戶同散戶一樣係在股市中搵食,不過大戶財雄勢大,玩波幅,升銳退急,夠晒嚇人!
本周一先話過,大戶今次將個市抽高幾千點,跟住又全方位造淡,調整冇千幾二千點,唔會收手,家下跌咗千三點,夠未?對大戶嚟講,跌多啲當然更好。

林大中新候低吸

6月下旬,恒指在21800至22000之間整固咗8日,而50日線在21843(上升中),相信恒指落到呢個水平,會有強力支持,由高位起計,亦跌咗千七至千八點,雖然跌幅唔係好大,只約7%多點,但大戶應該夠晒位轉身。
恒指在6月中升穿21000大關阻力,急升2500多,以調整升幅的0.5及0.618計,恒指分別可見22279和21978,21800至22000係關鍵位,唔排除今次調整會在此水平到底。狂牛衝後小休,唞得越耐越好,日後再衝,個勢會仲勁。
上月推介過嘅股票,其中有兩隻個勢特別強,就係中國林大(910)同中新集團(563)。林大前日最高見3.20元,收3.18元,噚日最低插到2.82元,但大戶仍然繼續大手食貨,由低位抽番上2.98元收市,成交好勁,有2.76億股,消化完之後,會再衝一段。
中新升上2元水平後,噚日收1.98元,跌0.15元,在高位仍有好強承接力,每一次調整都係低吼機會,中線持有,會獲大利。

郭兆誠