以前會俾人話：「做乜一個人打機咁自閉㗎！」講得冇錯，但如果一班人互片咁又點計？自從NDS版《孖寶賽車》被Game友評為史上最茅嘅連線遊戲之後，睇怕《太鼓DS》將會變成第二之最！遊戲提供四人作賽，咪以為齋鬥評級分數就算，查實你可以向對手掟炸彈、落章魚，妨礙對手順利演奏，勁茅躉！因住打鼓打出火呀！
記者：陳國輝
攝影：陳陶鈞
師傅玩NDS：唔夠我精采
《太鼓DS》提供約四、五款敲擊花式畀大家搶分，其中最嘥氣力嘅是連環打。小記畀大埔區國術龍獅會嘅邱師傅試玩，玩後佢竟嫌敲擊花式未夠精采，仲話：「打鼓，其實有好多種玩法嘅！」
醒多你四招
第一招：鼓邊側敲
需要將鼓棍集中埋一邊快速敲擊，唔使點用力，所以聲音特別清脆，對付連環打最有用。
第二招：兩邊側敲
與第一招相比，分別在於手勢唔同，你可選擇喺兩邊同時敲擊，出嚟嘅效果一樣。
第三招：㩒鼓
出力敲擊完一下之後，再用手掌㩒住鼓面，令鼓聲具有變化；但呢招不適用於連打。
第四招：重擊
拎起鼓棍，雙手舉起，然後同一時間出力敲擊落鼓面，呢一式聲音夠響，師傅話最有氣勢。
幾十首歌最愛孖寶
「拎住支PDA筆仔當鼓棍，真係唔多習慣！」原來邱師傅係一名「獅頭」，間中亦擔任鼓手要職。佢認為打鼓最大嘅樂趣在於掌握音樂節奏，秘訣係在心中、在耳中，唔係一味貪快同狠！「《太鼓DS》都幾易玩，因為遊戲本身播緊音樂，就算太嘈聽唔清，只要一到位我㩒掣敲擊就攞分，一陣就學識。」幾十首音樂裏面，邱師傅最鍾意《SuperMario》，係童年最愛遊戲之一。
連線對打送你炸彈
「冇諗過玩音樂Game都可以出術，咁比試好茅啫！」邱師傅首仗連線對戰，點知就遇上滑鐵盧，又俾人炸，又俾人擾亂節奏，最終慘敗！其實《太鼓DS》嘅對戰模式，除咗考驗你敲擊命中率之餘，仲好講求策略。
例如對手分數高過你幾倍嘅話，你可以掟炸彈令對手不能演奏，或採用播放其他音樂嘅道具來擾亂對手，策略得宜嘅隨時變最終大贏家！至於唔想玩連線，遊戲仲提供個人升級模式，畀你不斷挑戰更高難度嘅音樂！
機舖也煲NDS
遊戲推出後，據Game舖老闆講《太鼓DS》曾被炒上$400，後來更一度斷貨，要8月中先再返貨！起初小記都唔係好信，但早兩日入機舖，先發現呢隻Game咁勁！眼見一班後生仔排緊隊等玩街機版《太鼓》，等嘅過程裏面，佢哋竟然拎咗部NDS出嚟「止渴」，場面都幾搞笑！
PROFILE
名稱：《太鼓之達人DSTouchdeDokodon》
機種：NDS
開發：NAMCO
類型：音樂
玩家人數：1人
連線對戰：最多4人
售價：$348
查詢：27253338（iGamer）
