廸士尼3D動畫電影《五星級大鼠》今日上畫，老實講未必及《哈利波特：鳳凰會的密令》連續劇式的吸引，但睇過優先場的同事都說電影非常有意義：AnyoneCanCook！老鼠仔Remy夠晒可愛，仲要嘴刁兼識煮美食，遊戲中則講牠去搵食煮食，全靠要周圍跳、周圍爬，仲要搞破壞！
記者：馬靜兒
《五星級大鼠》講乜先？
老鼠仔Remy天生嘴刁，視廚神為偶像，志願是成為五星級大廚。牠膽粗粗去到美食之都巴黎，但身為老鼠又苦無機會。後來遇上不諳廚藝、論論盡盡的Linguini，兩個拍檔日日扯吓頭髮，夾手夾腳，終於煮出名堂。
音效好過畫面
可能因為是電影Game，製作時間不多，所以畫面感覺唔夠真實，有點離身。反而遊戲的配音有點驚喜，為了大家要玩得投入，遊戲的配音全部由電影的原聲配音參與製作，所有角色全都由電影的原班人馬親自配音。邊玩好似邊睇戲，最重要是可以參與其中，玩得特別投入。不過，呢隻始終是鬼佬Game，配音當然是英文。我始終喜歡鄭中基配Remy把聲多啲、搞笑啲，親切啲嘛！
遊戲跟足電影
遊戲完全依據電影情節改編，為食老鼠Remy希望成為五星級大廚。舉家搬到巴黎一間頂級餐廳的地下水渠居住，偷師、找材料、試煮菜。遊戲中的Remy要周圍走，找材料，又要找食譜。
遊戲收集了超過20個電影中的經典情節關卡，玩家要跟主角Remy為得到美食而到處冒險，幕幕緊張刺激，例如牠們初時居住在阿婆的花園，入屋找材料煮食物，結果被阿婆發現，用長槍追殺，就跟電影情節完全一樣。
玩落有蹺妙
1.記得搞破壞
最喜歡Remy條老鼠尾，可以用來撞周圍的食物，完全發揮老鼠尾的本領。又在木箱、垃圾桶、貨架上爬來爬去，仲要玩埋鋼線，十足做咗雜技鼠。記住最重要係搞破壞，看到任何物件都要打爛，因為好多材料都要用爆破方法炸開木箱。任何物件帶藍光，就表示有點古怪，要爬上去看個究竟。
2.10個得MiniGames有排玩
這遊戲都有MiniGames，而且仲有10個之多，可以玩餐飽。遊戲以Remy為第一身，提供多達6個超巨型版圖任你穿梭，到處搜括法國美食，收集煮食的食譜和材料，中途更要逃避野狗及人類的追捕。
3.熟口熟面似CookingMama
當你收集到足夠食譜，就可以烹飪來一決勝負，可依照食譜上的步驟，切切煮煮，煮出美味的菜式，以得分來決勝負。這一部份又真係好似玩任天堂的《CookingMama》，女仔可能會好Enjoy。
Profile：
名稱：《Ratatouille》
機種：XBOX360、Wii、NDS、PC
發行：THQ
類型：動作
玩家人數：1-4人
售價：$299（XBOX360）
查詢：27390268（HMV）
