唔再做金融地產嘅軟庫發展𠵱家轉戰內地，希望搞大啱啱收購嘅中國仁濟醫療，專心搞好腫瘤同癌症醫療中心網絡。打響頭炮之作，就係同永安旅遊拍住上，合作推出「三日兩夜上海體檢之旅」，玩樂之餘都不忘注重身體健康。
斟苗僑偉帶團
永安旅遊總經理陳淑芳話，呢個團真係抵到爛，三日兩夜包食包住包檢，都只係$13999，仲包兩晚五星酒店，比起本港私家醫院單係做個同類檢查，都承惠4萬銀。「體檢團」參加者將遠赴中國仁濟醫療旗下嘅上海PET-CT高端體檢中心，首尾兩日都係飲飲食食自由行，中間嗰日朝早就做檢查，到下晝就已經拎到份詳細檢查報告，不過係簡體字，繁體字同英文要等一個禮拜。
為咗加強聲勢，永安仲初步斟緊三哥苗僑偉、型男任達華等帶「明星體檢團」，主席余錦基就做榮譽領隊，就連永安代言人周汶錡都斟緊。「體檢團」將於8月17日起，逢星期五出發，唔知第一團嘅反應會係點呢？