中華廠商會噚日宣佈，委任前高官梁世華做該會新設嘅行政總裁職位，任期由8月1日起生效。以往廠商會冇呢個位，只有總幹事；公關小姐解釋，自前總幹事劉達明離職後，就將個職位改名，係因為要與時並進。
為官30年
新人梁世華，之前曾經做過官。佢畢業於香港大學，1971年加入港府工作，73年加入AO行列，先後喺唔同部門出任要職，包括民政署助理署長、副港九政務署長、副文康廣播司、副運輸司、港府駐日本經濟貿易代表，以及康樂及文化事務署署長等，03年底退休，之後曾投身私營機構擔任管理工作，曾任信和集團總經理、香港管弦樂團行政總裁，以及市區重建局企業傳訊總監。