港股再遇大調整，散戶應該如何自處，是撈底良機，趁勢出貨，抑或靜觀其變?歸納8位專家意見，普遍認同是次調整「冇咁快完」，針對不同投資者，揸重貨者，可考慮將獲利貨減磅或趁跌市重整投資組合；未有持貨散戶，在市況未明朗下不建議撈底，如堅持入市則分段吸納優質股，勿重鎚出擊。
可趁機換馬
豐盛融資資產管理聯席董事黃國英暗示，「是次調整唔講得笑」，幅度有機會超逾3月初急跌近2000點。部署上，由於跌市初期以重磅股及優質股先捱沽，然後才輪到二三線股，因此細價股隨時成為後市開刀對象。投資者可藉此機會進行換馬，未有持貨者暫毋須費神揀股。
8月屬調整市
凱基證券研究部董事鄺民彬指出，今年港股與日圓走勢「唇齒相依」，圓滙轉強時，港股多逢跌市。他指8月屬調整市，日央行月內隨時加息，圓滙走勢成大市關鍵，22000僅為初步支持，掃貨亦宜在此水平樓下分注進行。
資深股評人陳永陸亦建議欲入市散戶「再等一會」，如手頭有獲利貨可酌量減持套現，留待調整完結時「買好嘢」，若不幸手上持股「坐艇」，則視乎「蟹貨」質素，去蕪存菁。