本欄喺五月二十七日提起東院道小學五十周年聚餐一事，席設百德新街東湖海鮮酒家，時間係十二月一日星期六。一位讀者Caroline來電郵話佢自己係東院道官立上午校一九七○年度畢業生，與一班同學想參加。咁就請Caroline打電話畀何萬森老師，電話係2560-8680，2569-6191。
大公關華德亦來電郵，傳來一份關於YouTube錄影帶嘅評論。呢個video幾得意，特登比較富小子（以墨爾本某家庭為例）與窮小子（飢餓國家兒童）嘅日常生活。富小子話今日食麥皮/穀糧好難啃，因為要行幾十米先至搵到牛奶；窮小子就在戰亂貧餓地區覓食。搵到乜就會食乜。
呢個比較好現實㗎。一位中學生到港大上暑期課程，話港大canteen內之「紅酒燴牛尾」完全唔係嗰皮，只係得個名夠吸引。左丁山對佢講：「可能真係難為咗你，不如去中環Jimmy'sKitchen食呢個菜啦！」YouTube呢個video嘅主旨其實係宣揚八月十七至十九日舉行嘅「饑饉四十小時」大行動，為貧窮國家孩子籌款，播出後大獲好評，頭四日就有二十萬個hit，一啲富國富孩子睇完好感動。
YouTube之興起，改變唔少宣傳、推廣嘅技術，令到全球化更加快速化，更容易改變世界潮流。富小子可能唔肯睇電視雜誌講饑饉四十，但上YouTube睇幾十秒，就容易得多。政治方面，上星期睇CNNHeadline直播美國民主黨幾位準總統候選人回覆YouTube觀眾嘅問題，且不論佢哋嘅表現、亦不論觀眾嘅問題是否合適、合題，但美國普羅大眾可以用此形式詢問政治人物，正正合乎麥魯恒嘅名言：媒介就是信息（TheMediumistheMessage），以後全世界嘅政客都要走落凡塵，透過YouTube與普羅大眾對話，爭取選票，而YouTube辯論必然不可避免，邊個政治人物唔識得利用呢個新媒體者，注定吃大虧，故此形象顧問與言語顧問，勢必吃香，搞政治公關，以後多一層考慮。