日本青春女星澤尻英龍華憑住日劇《一公升眼淚》走紅後，經常撩事鬥非，流露惡女真面目，搞到阿Net都好懷念佢以前清純嘅一面。
只得幾個男Fans
最近阿Net就喺網上搵到澤尻仲做緊水着偶像時，俾電視台整蠱嘅片段，當時一臉無知嘅澤尻，俾台下一位電車男玩到謝，相信𠵱家真係好難會有咁嘅情況出現。
當年17歲嘅澤尻只係半紅不黑嘅水着偶像，當日佢去到品川舉行talkshow，現場只得幾個男fans，場面頗為冷清。電視台搵嚟諧星堀內健扮成騎呢電車男混入其中，向來見慣一班電車男fans嘅澤尻不虞有詐，就咁跌入呢個整蠱陷阱中。
堀內趁住澤尻喺台上同司儀傾偈嗰陣，不停喺台下搞搞震，一時舉起畫咗古怪圖案嘅紙牌、一時又失驚無神喺口入面吐出乒乓波，搞到原本正經講緊嘢嘅澤尻，最後都忍唔住爆笑，非常搞鬼。
電車男玩謝澤尻
網址： http://vision.ameba.jp/watch.do?movie=195569
版主：阿Net
本欄逢周一至五刊出