今季最快嘅球隊係邊隊？我求大俠就估係西甲球會巴塞隆拿喇！皆因據講伊度奧、亨利、美斯同施雲奴百米跑，成績都係10秒多啲啲，雖然比唔上世界紀錄保持者保維嘅9秒77，不過如果4人組成4x100接力隊，分分鐘有得玩奧運㗎！
施雲奴美斯一樣快
巴塞隆拿最近喺蘇格蘭集訓，教練組特登用high-tech儀器計算球員速度同射波球速，結果就發掘到幾個百米跑天才。好似伊度奧百米跑成績大約係10秒04，亨利10秒08，美斯就係10秒09，最快竟然係左後衞施雲奴，都係10秒鬆啲。
以百米段速計啫
當然，呢個測試唔係好準確，例如佢唔係測球員跑100米所需時間，而係分為一段段，每段8米，然後推算百米成績；普遍球員錄到時速25-30公里，而巴西球員施雲奴居然跑到時速35公里，教練列卡特嚟緊球季應好好利用佢喇！
現代足球好講求速度，不過好多球星一味得個快字冇技術，成日帶波直出底線，好似尼日利亞前鋒馬田斯就係例子。但係呢4匹巴塞快馬就唔同，個個跑得又扭得，射波又準，對手下季肯定有排受。
求大俠忽發奇想，如果季初有個歐洲球會慈善陸運會，睇吓邊隊最快都幾過癮。而4x100米呢項，睇怕都係巴塞隆拿囊中物，最強勁對手可能係傑斯、基斯坦奴朗拿度、沙夏、朴智星嘅曼聯隊，唔知呢場比賽幾時有得睇呢？