應屆港姐冠軍張嘉兒、亞軍王君馨、季軍周美欣及旅遊大使何傲兒噚日喺金鐘康泰旅行社領獎，大熱倒灶嘅何傲兒雖然只係得個旅遊大使獎，不過就獲大會頒發五萬蚊旅遊現金，而冠軍張嘉兒都只係得二萬蚊旅遊現金咋。
風頭躉多仇家
何傲兒參選港姐以嚟，已經多次俾人爆料，負面新聞多多，估唔到𠵱家選完都仲有人向傳媒爆料，話佢入讀香港大學專業進修學院修讀法律，同學校嘅高Sir發展忘年戀，重話佢係靠高Sir幫忙，先可以升到班。何傲兒當然係例牌否認啦。問到佢喺學校係咪風頭躉，引埋啲仇家經常爆料中傷，佢話：「梗係唔會啦，學校都好多靚女，同學都好乖嘅。」
何傲兒憑住旅遊大使呢個獎，已經順利令佢同無綫簽咗15個月嘅港姐約，日前試咗鏡嘅佢就話考慮緊停學一年，佢話：「屋企人都好支持，不過我都會繼續進修。」