劉德華與郭富城已經有14年沒有合作拍戲，最近馮德倫有意再度撮合兩位天王合作演出新版《英雄本色》，兩人將飾演一對誼兄弟，對於這次合作，兩位天王都期望擦出火花。
馮德倫籌備經年的新版《英雄本色》已定於明年三月開拍，該片由劉德華的Focus電影公司投資，這次翻拍67年龍剛版的《英》片，故事發展主要是環繞兩兄弟恩怨情仇，舊版由謝賢演出的大哥角色，已鐵定由華仔飾演，至於由王偉飾演的誼弟，將會由郭富城擔演，馮德倫期待這對夢幻組合能夠帶給觀眾新鮮感。
望再擦出火花
雖然華仔與城城早年已合作過《九一神鵰俠侶》、《五億探長雷洛傳之父子情仇》、《機Boy小子之真假威龍》及《超級學校霸王》四部戲，但兩人距今已有14年沒有再合作，馮德倫認為今次兩位天王再合作，應該能夠有新的化學作用，他表示：「我睇完城城演嘅《父子》之後，發現佢原來都可以演好火爆嘅角色，演技又進步咗，所以我覺得佢幾啱演呢部戲，佢嘅角色有啲似阿爾柏仙奴（AlPacino）喺《疤面煞星》（Scarface）嘅角色，幾有發揮，我諗對城城嚟講係一個新挑戰。」
城城昨日證實已收到馮的劇本，他說：「個劇本我啱啱收到，仲未睇晒，不過初步聽馮德倫講過個古仔，覺得都唔錯，但𠵱家重未簽約，因為都要睇吓啲檔期就唔就到，不過咁耐冇同華仔合作拍戲，我都好期待。呢十幾年我同佢都經歷過好多嘢，大家都成熟咗，唔知再合作又會有乜化學作用呢？」
被問到將與城城合作，華仔昨日在電話中說：「係咩？我唔清楚，我忙緊宣傳新碟同籌備演唱會，都未得閒坐底同馮德倫詳談，其實導演搵乜人做乜角色，我冇乜意見，因為導演先最了解邊個做會最好。搵城城都幾好呀，我哋都好多年冇合作過。」
爆18歲瘀事
此外，華仔日前到台灣宣傳唱片，他在ChannelV節目內大爆18歲瘋狂事，他說當時剛入訓練班，在實習時遇上當紅的周潤發，因為跟發哥高度有距離，華仔突發奇想到道具店找厚底鞋，高高興興穿上後，卻在下樓梯時跌倒，之後更要到醫院療傷，十分搞笑。
採訪：葉雪、蔡如玉
