去年回歸香港拍劇的伍衞國，73年訓練班還未畢業便有機會在《亂世兒女》擔正做小生，演過無數愛情劇的他、曾跟汪明荃、李司棋、呂有慧等花旦談過情，到近日播映的《歲月風雲》，伍衞國依然是主角，小生地位35年屹立不倒。只是，這位螢幕上演愛情戲揮灑自如的靚仔小生，對於拍調情戲原來相當「騰雞」。
被誤會是新郎
回想當年拍愛情戲經歷，伍衞國仍記憶猶新：「以前電視劇邊度有錫嘅鏡頭！嗰個時代好保守，通常你一準備錫，門鐘就會叮噹叮噹咁響。記得拍《亂世兒女》嗰陣，監製梁天叫我捉住呂有慧雙手，由佢對手掃上膊頭，𠵱家拍就梗係冇問題，但70年代社會好保守，眾目睽睽下拍調情戲，我驚到手都震埋，呢世仔都未試過咁多人睇住我談情說愛，當時我都唔知點掃，結果NG完又NG！我以前拍咁多愛情片都未咀過，頂多只係擁抱吓。」
70年代當家花旦中，伍衞國跟呂有慧合作無數，二人更被視為電視螢幕上的金童玉女，後來呂有慧結婚，竟惹來笑話連篇，伍衞國說：「當年呂有慧結婚，咁啱佢老公真係叫金童（現已離婚），啲人以為我同佢結婚，我去酒店飲嗰日，班影迷仲圍住我問：『乜你唔係同呂有慧結婚咩？』」
儘管經常在觀眾面前談情說愛，伍衞國卻從不喜歡把自己感情生活公開。90年代他跟葉玉卿分手後，跟劉曉慶戀上，但拍拖5載又告分手收場，談到劉曉慶，伍衞國只淡然說：「大家再見亦是朋友，識咗佢之後，我去咗北京生活咗5年，如果唔係因為佢，我唔會喺北京生活，唔會認識到中國係點，呢樣係我最大得着。」
發哥做路人甲
電視台早年沒有臨記制度，許多時路人甲乙丙角色，也是幕後工作人員或訓練班同學擔當，所以伍衞國主演的電視劇中，不難發現他學弟周潤發和杜琪峯影子，談到周潤發，伍衞國曾有一次難忘經歷，他說：「喺《江湖小子》入面，我同佢合作，有日我哋一齊喺外面拍宣傳片，梁家樹做導演兼攝影師，我哋拍咗成日好辛苦，到太陽落山嗰陣，梁家樹想話換菲林，點知打開一睇，原來佢唔記得入菲林。」
遭雪藏離無綫
訓練班還未畢業便有機會擔正做主角的伍衞國，自覺在溫室長大，不知挫折，也許唯一一次，便是當年被無綫雪藏了整整一年那段日子，他說：「當年我同TVB簽咗3年，寫明每年人工冇得加，第二年因為我表現好，佢哋加咗畀我，但到第3年冇得加，我梗係唔開心啦，係咪我表現差？話晒我都係當家小生，佢（指周梁淑怡）話唔得，除非我再簽3年，我話佢用時間換取我應得酬勞，大家傾唔掂，佢哋最後係加咗畀我，但跟住雪我，咁我咪走囉，我性格係咁，好理直氣壯，唔做咪唔做囉！我一開始喺TVB時500蚊一個月，走嘅時候1200蚊，後來過到佳視底薪5千，個個月爆騷爆到1萬，我買樓都係靠嗰陣時咋！」
攝影：陳慧安
場地提供：KingLudwigBeerhall
人物誌：演反派突破框框
56歲的伍衞國為70年代靚仔小生，72年入讀無綫第2期藝員訓練班，主演過《紅樓夢》和《書劍恩仇錄》等劇，並在《巫山盟》中與關菊英合唱經典插曲《田園春夢》，76年離開無綫後先後到佳視、邵氏和麗的發展，79年於《天蠶變》（圖）首次演反派，令人刮目相看。95年為無綫拍攝《情濃大地》後往中、台兩地發展，去年為無綫主持《超級靚聲演鬥廳》及拍攝《歲月風雲》。
伍衞國先後與葉玉卿和劉曉慶拍拖，00年與劉曉慶分手後感情至今未見有着落。
