蔡卓妍
順便做善事
「我今日用嘅係Fendi手挽袋，喺出面買要成5千幾蚊，之前我幫呢個牌子做function，所以就送畀我。其實𠵱家只要大家買呢個袋，就會有限量公仔送，佢哋仲會捐錢畀願望成真基金，我覺得好有意義，所以呢排會用多啲呢個手袋幫手宣傳。個袋好似細細咁，但可以放好多嘢，好實用，加上呢個牌子以往出嘅手袋比較成熟，但今次呢個就有條反反哋光嘅紅色邊，睇嚟young啲、潮啲。」
吳文忻
百搭好襯衫
「我用呢個Prada袋係貪佢大細適中，唔會太大，又唔會太細，袋款唔會太女人，有少少sporty感覺，加上可以孭喺膊頭度，我就最鍾意。其實平時causalwear我都會用呢個袋，因為真係好百搭，除非係出席function，我先會揀細啲嘅手袋仔。至於我平時買手袋，最主要睇吓襯乜嘢衫，工作時就鍾意用大袋，方便將所有嘢放晒入去。」
官恩娜
自製名牌袋
「呢個AndreRoss手袋睇落好大個，但唔算好貴，個袋用料好好，皮又靚，全部都係喺巴黎製造，最特別係個袋釦同啲窩釘可以自己揀，你鍾意乜嘢款都得，仲可以將自己個名釘喺個袋度。其實我用親袋，都好似走佬咁款，因為我實在有太多嘢要放喺袋度，好似化妝品咁，有時又會帶定多套衫出去換，所以呢個袋好啱我。」
鄧穎芝
至愛平靚正
「呢個手袋喺日本買，只係200幾蚊，好抵用，平時呢啲手袋仔離不開黑白色，所以我一見到呢個綠色嘅即時愛不釋手，因為畀人夏日感覺。唔好睇佢袋細細，但裝到唔少嘢，加上我平時揸車，有乜大件嘢都放喺車度，唔需要用太大嘅手袋，只要放到啲隨身用品就得，就連朋友都笑我成日唔帶手袋，我唔係特別鍾意名牌，所以買手袋會揀啲一年四季都啱用。」
採訪、攝影：駱華齡
