變形金剛啱啱上映，不少Fans都大叫過癮。鬼咩，大家都係飲住呢套卡通片嘅奶水大，首次喺大銀幕睇到真人版，即刻激發起集體回憶。雖然《變形金剛》一把年紀，但近期亦俾Fans炒到飛起，當中第一位竟然唔係主角柯柏文，亦唔係壞蛋麥加登，係收音機音波。睇晒10大熱炒，即睇你手上嗰隻值幾錢！
記者：葉雪芯
部份攝影：梁細權、陳偉強
No.1 音波MP3機 一出升1倍！
變形金剛生於舊時代，當年卡式收音機已經算好高科技，所以劇中角色音波擁有呢種武器好鬼勁。2007年係數碼年代，唔通仲會有人聽Cassette帶咩！音波在今年「自我增值」，變咗一部MP3，係7月變形金剛系列之最新產品。不少Fans一推出就搶住去買，皆因有得玩之餘仲好實用。音波原本就係一部收音機，利用音波來攻擊敵人，今次可以正式播放音樂，原價約$1,000，網上俾人Bid價炒到$2,000，都仲大把人爭住Bid。不過，據小記明查暗訪後，發現旺角部份玩具店還有存貨，有藍、白兩色，仲賣緊$1,280，不過聽聞貨去得好快，想入貨就要嗱嗱聲！
查詢：28863888/宇宙船
No.2 TAKARATOMYFree7.0
變形金剛波鞋4個月升60%
TAKARATOMY於今年4月份推出這款變形金剛波鞋，分別有紅×白博派柯柏文及黑×灰狂派麥加登兩個版本。一對唔着得嘅波鞋，正正因為佢夠九唔搭八，估佢唔到咁都變得，合晒Fans心意，夠頂癮。呢對波鞋由最初推出約$500，到𠵱家已經炒到超過$800，唔夠4個月有咁嘅成績，十分厲害！
No.3MP01柯柏文升66%
日版MP系列一直有價有市，因為外形和可變性最好，而呢隻柯柏文就被譽為歷來最靚、最神似嘅一款。產量少，長期成為熱炒之物。其中20周年版本更加值錢，因為1984年推出的初版，當時被Fans批評唔似卡通版，後來再出一次，採用了較新的技術，活動關節、超合金，由原先的$600炒至現在的$1,000以上。
No.4 MP03星星叫停產升75%
唔少Fans覺得星星叫好有型，但呢款日版MP03星星叫則是最樣衰的一款，綠色外形，唔似卡通角色。不過樣衰有價，仲大把人要，由原價約$400炒到起碼$700。炒得起都不外乎一個原因，就係廠方已經唔再出產，無晒貨，唔貴有鬼！
No.5 MP04柯柏文+貨櫃
絕版升倍半！
原則上同MP01無分別，但全因多咗一個貨櫃，又貴咗。被稱為完全版MP01，Fans梗係鍾意玩得完整啲。已經絕版，要擁有惟有靠炒賣市場，難怪由$600炒到$1,500以上。
No.6 08大黃蜂升124%
變形金剛會會長Patrick形容呢隻大黃蜂嘅炒賣情況為「好大件事」。當時在OK便利店賣$129.9，有Fans早於開賣前一星期排隊都買唔到!𠵱家，香港現有貨量又極少，已經炒高至最少要$290先有得傾！
No.7 2呎高博派格蘭身價過萬！
第三代博派首領福特個細佬格蘭，足足兩呎高咁大隻，極罕！1988年推出後，美國因未能通過玩具安全系列而絕版。變形金剛會會長當年用$8,000買返來，𠵱家過萬！
No.8 復刻版麥加登升60%
日版復刻麥加登，可變一把槍，有齊所有配件。已絕版，正是當炒的賣點，原價$500𠵱家炒到$800。但盛傳今年8月，可能會再次推出，令熱炒程度稍遜。
No.9 07年電影版柯柏文一度斷貨！
新出電影版，係老變Fans都一定會買，賣$439.9，曾斷貨，但個價不變，Patrick坦言炒價應該只係$100、$50咁上落。或者過多幾年，可能有得炒都唔定。趁𠵱家仲有貨，買番隻當紀念都唔錯。
No.10 山口式馬格斯唔似樣升140%
老變Fans稱之為「Re-colour柯柏文」，白色，外形與柯柏文一模一樣，細隻版，唔識變形，亦與卡通造型非常唔似。以上種種，成為老變Fans唔鍾意佢嘅原因。不過，亦有Fans覺得咁先夠特別，當初賣$100，𠵱家炒到最平要$240先有。
期待之炒物：變形貨櫃車iPod喇叭！
出完音波MP3，另一波就係變形貨櫃車iPod喇叭，日本TAKARATOMY方面暫時未公佈推出時間、顏色、價錢，不過咁有型，又咁實用，音色如何Fans都一定會買！
網址都有得炒？
呢期任何變形金剛嘅嘢都值錢。喺eBay有人將網名Transformer2.com註冊咗，之後放上網開價$35,000美金，可惜暫時無人Bid。差唔多等於28萬港紙，難怪無人買！
