馮德倫近年致力鋪橋搭路開拓荷李活市場，希望終有一日達成執導西片的心願，以目前荷李活電影人對他的重視，相信這個願望很快會達成。其實他最期待有朝一日，他執導一部荷李活的電影，女主角是與他拍拖8年的女友莫文蔚，撇開私情，他認為對方是一位可塑性很高演員，可惜一直欠運氣，他又自爆最愛喝女友的老火湯：「佢真係入得廚房出得廳堂！」 撰文：陳月媚
現年34歲的馮德倫與38歲的莫文蔚（Karen）相戀了8年，這8年間，兩人不斷被追問何時結婚，但兩口子始終未有這個打算，雖然他們已過着同居生活，形同夫妻關係，但實際上還欠一紙婚書，不過在下半生，馮德倫心裏選擇了要與Karen一起度過，只要Karen開心，他就開心，若Karen不快樂，他也不會快樂。
入得廚房出得廳堂
其實Karen除了個性吸引馮德倫外，原來他對女友的廚藝也讚不絕口，閒來沒事做，Karen會為他燒飯，做一頓愛心無限的晚餐慰藉男友。馮德倫說：「Karen得閒都鍾意落廚嘅，佢煮嘅排骨臘腸煲仔飯真係好好味，仲有佢煲嘅老火湯一樣好夠火候，至於佢做嘅Tiramisu好食到唔停得口，佢真係入得廚房出得廳堂。」
這對小情人應該打風也打不掉，但談了這麼多年戀愛，兩人事業也見成績，為何到現在還未想拉埋天窗？馮德倫說：「等我拍埋手頭上兩部戲，我考慮緊希望同佢喺出年結婚，但我仲未求婚，唔知成唔成呢？當然婚期要視乎我嘅工作進度。𠵱家我係乜都冇諗，淨係想專心拍好《英雄本色》同《跳出去》兩部戲，至於去荷李活拍西片嘅事，我會同時進行，不過去荷李活拍戲始終同香港唔同，佢哋搞一部戲可以搞幾年，因為美國對劇本籌備好嚴謹，搞一個劇本分分鐘要搞幾年。」
其實早於03年馮德倫已經去過美國發展，可惜當時運氣麻麻，始終沒有機會演出西片，加上香港發生沙士事件，令他有家歸不得，迫於在美國住了一年才回港，但千萬想不到，在這段沮喪的日子，他會與新版超人班頓羅夫（BrandonRouth）的經理人Stewart成為同房，成功為他打開荷李活之門。
遇超人勇闖荷李活
馮德倫說：「世事就係咁奇怪，當年我喺美國碰運氣，喺幾部西片試鏡都落選咗，嗰陣咁失意，我同個同房Stewart都係咁運滯，佢當時介紹未成名嘅Brandon畀我識，大家都因為得閒，所以成日都有機會碰面。
「後來Brandon因為拍咗《超人──強戰回歸》（SupermanReturns）紅咗，我哋喺美國再碰番面時，佢兩個又介紹我識咗呢部戲嘅導演BryanSinger，佢咁啱又係湯告魯斯（TomCruise）部新戲《Valkyrie》嘅導演，後來我又因緣際會識埋個監製ChrisLee，喺佢介紹下，我先至有機會認識到湯告魯斯，𠵱家睇番，原來嗰一年喺美國一啲都冇白過。」
攝影：仇志德 場地提供：FatAngelo's
論盡5大導
馮德倫演而優則導，成功轉型，不單止在香港影壇吃香，想不到遠在美國的電影公司一樣垂青他，但其實他自覺做導演的歷練尚待磨練，不過電影圈中有幾位導演他很欣賞。
周星馳轉數好快
馮德倫日前接受本報專訪說：「周星馳、吳宇森、王家衛同杜琪峯呢四位導演我都好鍾意，佢四個之中，近呢兩年因為要同星爺合作搞《跳出去》呢部戲，所以經常有機會一齊度嘢，佢個腦轉得好快，度對白簡單而精警，導演技巧越嚟越利落，佢拍《長江7號》時，我去過寧波探班，有場戲佢同肥仔聰做對手戲，佢因為一句對白共NG咗幾十次，足見佢嘅認真程度。」
吳宇森浪漫好客
03年馮德倫在美國謀發展的期間認識了吳宇森（阿John），他鄉遇故知，兩人很快就熟絡起來，阿John更請他回家吃飯。馮德倫說：「阿John好nice，佢拍嘅動作片有強烈個人風格，每個鏡頭都營造出浪漫氣氛，佢所塑造嘅英雄人物相當成功，可以瘋魔萬千影迷，當年佢拍嘅《英雄本色》我睇過好多次，Mark哥呢個人物真係型到震，我有興趣入娛樂圈，完全因為呢部戲，因為呢部戲感染到我。」
王家衛港人之光
王家衛個人魅力非凡，這方面最令馮德倫羨慕，因為大部份紅星都可以不論片酬、時間去拍攝其作品，這種魅力不是很多導演擁有。馮德倫說：「王家衛嘅戲有一種好獨特風格，如果觀眾睇戲前唔清楚部戲個導演係邊個，但睇睇吓就可以發覺係王家衛作品，因為佢嘅作品無論喺攝影、美術同音樂方面都有強烈個人風格，而且佢打入外國人市場唔係靠動作戲，係以文藝片得到外國人認同，年年喺康城受到推崇，佢簡直係香港人之光。」
杜琪峯觸覺強勁
杜琪峯能夠商業與藝術並重，執導的電影類型多元化外，大部份作品仍可以保持住一定質量，其實並不容易。馮德倫說：「杜琪峯作品之中，我最鍾意《暗花》，雖然部戲唔係打正阿杜執導，但我知道大部份場面都係由佢拍，部戲拍得相當有深度，鏡頭運用得好好，佢的確係一位當今香港影壇最全面嘅導演，無論喜劇、動作、古裝同文藝片都難唔倒佢，阿杜對市場觸覺好勁，難怪佢啲戲可以保持高票房。」
劉偉強愛新嘗試
對馮德倫來說，劉偉強是一個奇迹，每隔一段時間就會創造出另一個高峯，實在令其他導演又羨又妒。他說：「我覺得佢好有運，經常創造奇迹，由《古惑仔》開始到《無間道》，佢經歷過幾個高潮，仍然屹立不倒，佢令我最佩服嘅地方，係佢好肯試新嘢，好似嗰陣《無間道》咁成功，佢即刻又整一部《咒樂園》出嚟，雖然唔算話好成功，但以佢咁嘅級數嘅導演仲咁搏，點會唔服佢？而且佢人品好好，之前我落選金像獎，佢都有鼓勵我。」
