唔係馬後炮，一直以嚟都話香港有兩件嘢好抵買嘅，一件係亞洲電視，另一件就係南華足球隊。香港雄霸華語電視節目製作多年，雖然近年被其他地區迎頭趕上，但爛船始終唔只三斤釘，香港免費電視牌照就這麼兩個，其中之一的亞視雖先後被轉手幾次仍未見有起色，但香港向來都有領導娛樂潮流的優勢，手執一個電視台牌照，怎樣說也是一件很有影響力的事，現今社會，有影響力就有價值，就只看新買主是否有心及有力去搞，初步看新買主召集的幾名猛將，都是真的懂得如何砌起一間電視台的實力派，而非齋追追女藝員搵搵着數之輩，久矣未看過電視起風雲，有競爭，有選擇，無論如何都是一件好事。
無論香港足球事業有幾谷底，得幾少球迷入場睇波，足球聯賽的比賽片段仍會在電視新聞上出現，報紙上也穩佔一定版位，還有特定體育節目報道，這便是最基本的影響力，你話如果拍一齣戲要使幾多錢才得到咁廣泛嘅報道？球隊當中又以南華最名牌，南華差不多等於香港人嘅足球隊，搞開ShowBusiness嘅羅傑承先生成為南華班主，唔知使咗幾多錢，但已儼如港產車路士班主阿巴莫域治般有台型，無論對羅旗下的娛樂事業或個人宣傳都有幫助，兼且如果發展得好，搞波仲可能係有利可圖嘅生意，一箭幾鵰。
本港足球一直由業內足球發燒友自己搞番，難免有點塘水滾塘魚的僵化，外國足球早已成為ShowBusiness的一部份，如今南華足球隊由搞開ShowBusiness嘅專家嚟搞，希望能搞出新局面、新球星，有球星才有擁躉，球市才會興旺。