「哨牙賓妹」外形洋化，個性睇嚟好爽朗同不拘小節，但原來佢份人好心水清，如果打佢工嘅就要留神嘞。哨牙賓妹不嬲記性好，吩咐過助手做嘅嘢，一定唔會唔記得，但佢仲係唔放心，自備記事簿，將講過嘅嘢全部記低晒，等人哋冇得賴。
試過有一次，哨牙賓妹請咗個唔熟性嘅新助手，佢叫新助手做嘅嘢一直冇做，哨牙賓妹忍無可忍，發脾氣追究，新助手似乎將成件事拋諸腦後，竟然話哨牙賓妹冇講過，佢一二三攞本記事簿出嚟，話幾時幾日曾經喺邊度吩咐對方做嘢，隔咗幾耐工作都未完成，新助手即時啞口無言，只能認衰，哨牙賓妹都算犀利。雖然打佢工要醒醒定定，但換個角度講，佢份人咁均真，起碼唔會出糧畀你就惡晒，凡事講真憑實據唔係屈人。
Textby關仁
