徐子淇自從由一個叫做有學歷嘅模特兒升格做豪門少奶奶後，簡直飛上枝頭，住大屋、出入有保鑣，穿戴嘅名牌仲日日鮮，每次出親嚟就好似名牌大滙演，Herm囗s、卡地亞、LV、Chanel晒之不盡。
媲美跑車價錢
呢個月17號徐子淇開刀生咗個重成8磅嘅千億BB女，老爺李兆基開咗口話送佢食足一個月要15萬嘅花膠蟲草補身，咁老公李家誠又有乜嘢表示呢？
徐子淇嘅御用化妝師GaryChung啱啱喺佢嘅一個雜誌專欄度大爆話：「我的好友李太剛收到老公送的一個價值120萬鱷魚皮+鑽石鎖Birkin！那是一輛名貴跑車的價錢！」Herm囗s嘅Birkin手袋，明星、名模、阿太個個手執一個，最普通一個都要4萬幾，子淇呢個120萬都算係袋王之中嘅袋王，將來拎出街，睇怕保鑣人數都要加碼！
噚日馮仁昭打畀GaryChung，佢唔否認咁話：「哈！你哋估吓啦！」而徐子淇同老公李家誠就喺截稿前都未聯絡上。
