臨近月尾，開飯竟然成枱罐頭餸，問阿媽係咪唔夠家用，豈料佢怒吼一句：「呢啲全部貴價嘢嚟㗎，唔食罷就！」半信半疑吃起來，翌日專登走去超市昅吓，發現老媽子所言非虛，真係成二百幾蚊罐喎，款式味道仲要騎騎呢呢，由蟹腳到雞批，今日就集齊6大扮晒上菜嘅至貴罐頭，睇吓有冇搵人笨先！
記者：趙珮倩、馮冠芝
攝影：陳盛臣、陳偉強
Model：千金小姐珊珊
TOP1 食蟹宴好過 俄羅斯蟹腳蟹肉（a）
（ChatkaRussianKingCrab）
價錢：$240
淨重：200g
二百幾蚊買罐蟹柳，到底有幾巴閉？睇番佢啲材料，有7成蟹肉3成蟹腳，啲蟹係來自俄羅斯Camchatka，蟹肉蟹腳用鹽水浸住，到底有幾好味？
一揭開水汪汪，果然有四隻左右鮮紅蟹腳，蟹肉約有一湯碗的份量，呈絲狀，開始試食！
評語：鮮就幾鮮甜，蟹腳每隻都有一隻指頭般大，夠肉地，但老實，用鹽水浸咗咁耐，完全冇口感，嚡口得很！240蚊，我寧願出街食個蟹宴。
抵買度：★★
TOP2 樣醜但香口 法國鵝髀（a）
（RougieGoose）
價錢：$165
淨重：575g
淨睇size，算係最大件最值回票價。一罐有兩隻鵝髀同鵝脂肪，又係用鹽水浸，老實說，睇個樣就麻麻哋，鵝浸到皺晒皮，開始覺得自己倒錢入鹹水海之際，本住食得唔好嘥嘅精神，一口咬落去！
這才發現它是「我很醜但我很香口」的示範作，鵝肉唔嚡口，更有香口的油甘味，算係意外Bonus，而且招紙冇誇張，真係有兩大隻鵝髀！油就油少少，但一定飽肚！強烈推介用幾蚊買個檸檬加落去，一轉眼化身為香檸鵝柳，有助驅走油膩感！
評語：算是最好食，樣衰得嚟唔算差，不過又係嗰句，百幾蚊，買隻燒鵝食更開心！
抵買度：★★★★
TOP3 配法包減油膩 法國帶子（a）
（CobrecoBretonneScallop)
價錢：$100
淨重：205g
法國罐頭版亁瑤柱！最過癮係佢附帶3隻貝殼，可以當碟仔用。
罐入面呈黃色膏狀，翻弄之下發現3、4粒原粒帶子，外貌似煮熟的亁瑤柱。伴隨的黃色膏狀疑是帶子肉、香草、橄欖油等的醬茸，十分油膩。
原粒帶子都幾香，但被醬茸蓋了味道，太鹹太油。建議配法式麵包、水牛芝士一同進食，減輕油膩！
評語：實在食唔慣油膩版亁瑤柱！對住黃色膏狀物好無助，100蚊食新鮮帶子好過，嗰3隻貝殼用嚟做比堅尼上衣令人睇見笑呵呵！
抵買度：★★囗
TOP4 違反方便原則 法國蝸牛（a）
（FrancaiseDeGastronomieEscargots）
價錢：$95
淨重：125g
再一次被佢連送貝殼的外貌欺騙！雖然真係有足十多隻法國蝸牛，並以鹽水浸透，但罐面居然要人一隻隻蝸牛肉放入去個殼度，再放牛油焗！完全違反罐頭一開即食方便至極的原則！
試一口，蝸牛的草腥味教人咽不下！或許焗了會好吃點，但我還是寧願以此價錢去餐廳食法式焗田螺！
評語：整個罐頭係蝸牛殼最盞鬼，發售人更指個殼可以循環再用，真係得啖笑。
抵買度：★★
TOP5 外表討好內裏腥 西班牙青口（b）
（GallaeciaMussels）
價錢：$63
淨重：110g
用植物油、醋、辣醬煮成的混合油浸青口，外表以酷似魚網的紅繩纏着，感覺討好。
揭開，鮮紅的辣油與罐面襯到絕，滿懷興奮試食……腥到叫媽媽！辣油對辟腥起不了作用，徒添油膩呢！
評語：小記認為可以將佢當蠔豉咁處理，用嚟燜冬菇可能別有一番風味！
抵買度：★囗
TOP6 買到9個新鮮貨 美國蘑菇雞批（c）
（FrayBentosChicken&MushroomPie）
價錢：$49
淨重：479g
一時好奇點樣將香脆酥皮雞批放入罐頭，買嚟當見識吓！
事實證明小記過於天真，一團白色果凍狀的物體，何來酥皮呢？終於，在底部發現一塊澱粉質物體，不過應該是整容後的樣子！食落都發現幾塊雞肉，唔算太嚡，但同罐頭圖片相差十萬九千里遠！
評語：這個價錢可買到9個美味雞批了，不然去看電影優惠場尚有錢剩呢！
抵買度：★
Shoplist：
a.city'super（22342888）
b.Great（29189986）
c.ThreeSixty（21114480）