暑假流流長，年輕人即使幾愛去沙灘玩兼曬太陽都好，日日去都會悶，暑假未完，想尋找刺激？唔一定跑返大陸滑草、走去澳洲玩空中滑翔，或飛去瑞士玩Snowboard。數碼港今個暑假就大搞「細」運會，付出60大元就可以有齊以上3個願望，感受3大運動的樂趣。今日就帶Model率先試玩，觀察遊戲激似度、測試遊戲刺激指數，以免山長水又遠入到去，唔玩又唔係，唔敢玩就仲唔抵！
記者：許維雅
攝影：梁細權
Model：CC、Tina、Kim、Steven
挑戰1 草上激滑考平衡
今次細運會的重頭戲絕對係「草上激滑」遊戲，於平台上搭建了一個高20呎、闊33呎、長超過150呎、總面積4,000呎的室外人工滑草場，加上全部購自日本的滑草裝備如護膝、滑草靴及滑草橇等，製作成本非同小可。不過只要付出$30（大概玩5至10分鐘），就可親身感受滑草運動的感覺，的確超值。
揀靴
一開始，當然要選擇適合自己Size的滑草靴。滑草靴跟雪靴結構差不多，腳外側有個鬆緊調節扣，一啪就掂。
滑草橇
配上適合Size的滑草橇，將滑草靴鎖緊滑草橇之上。先將靴頭放入鐵扣內，再用滑草橇黑色鐵扣將靴尾鎖實。
Model評語：
睇落好容易，但要好講平衡力，個心一驚就好難控制手腳。
刺激度：80%
激似滑草度：90%
蘋果Tips：
如果有滑雪經驗會較容易掌握，想於斜坡停低，要將滑草橇橫放，失去平衡的時候就向後跌。先決條件係唔好驚！因為心理完全影響控制整個人的鬆緊度，關節一緊，平衡更難。於人造草上學習了基本滑草技巧，不妨去日本、意大利等真正的草原上滑！
挑戰2 挑戰240呎高滑翔考膽量
另一樣空中滑翔遊戲，同樣付出$30（一次），讓參加者有空中滑翔的感覺，但一看便知跟真正空中滑翔運動可以於空中自由自在飛行還差很遠。由鐵架搭成的40呎高台，再配合Wire製成長100呎的滑道，最主要都係要你克服畏高。遊戲上的滑翔翼純裝飾，真正只係用Wire將參加者由40呎高台滑下。
兩個女仔先前聲明愛玩過山車、海盜船，結果挑戰失敗，被男仔恥笑！
Model評語：
由下面望上去好似唔高，滑翔感覺得意。但一坐近高台不禁一怯，克服跳嗰一下動作就好好玩。當然同真正空中滑翔差好遠。兩個女Model都曾玩過跳樓機，但測試中未能克服心理障礙。
刺激度：90%
激似空中滑翔度：50%
挑戰3 室內滑雪機大細啱玩
第3個遊戲室內滑雪機感覺最兒嬉，場內設置一部20呎×20呎的滑雪機，四周均圍上充氣氣墊。參加者只須站於不停擺動的滑雪板上，盡量平衡身體以防跌下，$30可以玩1分鐘，從旁有指導員教導玩滑雪板的正確姿勢。由於難度不大，加上如彈床的安全氣墊，所以最適合大人細路玩。
Model評語：
雖然完全唔似真正滑雪，但可以用來試練滑雪的平衡動作，感覺一樣。雖然唔夠刺激，但都好好玩，仲專登跌落彈床，好過癮！
刺激度：30%
激似滑雪度：30%
數碼港「細」運會
日期：即日至8月26日
時間：上午11時至下午7時
地點：數碼港商場三樓及數碼廣場
查詢：31663111
價錢：每個遊戲$30（3個遊戲優惠價共$60）（於數碼港商場消費滿$200，亦可享$10購票優惠）