TCL多媒體早於04年開始「走出去」，同法國湯姆遜喺04年7月成立合營公司TTE，拓展環球業務，但過去呢幾年一直掙扎求存，TCL多媒體（1070）06年度仍然錄得虧損高達25億元，搞成咁，梗係要有人起身啦。
兩高層前後腳走
母公司TCL集團日前公佈，集團副總裁兼TTE執行副總裁及TTE新興市場業務中心總裁易春雨，因個人理由而辭職，由集團原財務總監袁冰接任副總裁一職。聽內地報紙講，易春雨係集團董事長李東生提出國際化嘅忠實支持者，今次去職多多少少係替李總揹鍋。
易春雨係TCL集團海外市場元老，自98年帶領TCL隊伍喺亞洲、非洲、拉美洲、大洋洲、歐洲等市場開展跨國經營業務；可惜未有扭轉虧損嘅厄運。而早喺上個禮拜二，做咗9年嘅集團副總裁兼TCL電腦總裁楊偉強亦已辭職。兩人前後腳走，估計同業務停滯有關。
接手易春雨嘅袁冰今年37歲，做過集團戰略發展部部長，楊偉強個位就由集團財務管理中心財務管理部部長楊建榮接任。