積金局主席Henry范鴻齡，新官上任即刻點火，約傳媒茶敍，一開聲就話強積金服務供應商收費太高，令到本來唔係好多人關心嘅MPF，即刻做咗全城熱爆話題！個個打工仔都要焗住供，家吓連積金局主席都開聲嘈，Henry即刻變英雄。
除咗因為身在其位，必須為幾百萬打工仔謀福利外，Henry本身喺中信泰富位居董事總經理，雖然高級，但都係打工仔，所以一樣要供MPF，為人為己，梗係要積極啲爭取福利！
華華前幾日同佢傾開偈，問吓呢位積金局主席自己份MPF嘅投資策略，佢笑笑口話：「我投資都幾積極㗎，供款全部放晒喺增長基金，近幾年嘅回報係點？Sofarsogood啦！」
以范主席嘅年紀，買晒股票承受風險程度都算幾高，冇番咁上下身家收入同膽量嘅打工仔，真係要諗過度過先好學。Henry話，平日公事已經好鬼忙，又揹住咁多公職，周身唔得閒，所以投資理財嘅嘢，通常都係交畀兩個投資顧問，自己專心做嘢！
點忙都要陪老婆
工作係要做，但吊頸都要唞吓氣，華華記得，Henry舊年放暑假，請咗兩三個星期去東京、美國玩之餘，仲去埋菲律賓潛水，但今年就冇呢支歌仔唱。
原因係，今年暑假仲忙過舊年，家吓就研究緊將旗下嘅大昌行上市，嚟緊幾個月都有排忙。講係咁講，但佢唔會因公忘私，事關點忙都好，總會抽幾日陪老婆Tammy去日本行街shopping，果真係廿四孝老公！
[email protected]