打正旗號走年輕人路線，首創商場營業至深夜嘅觀塘apm，話咁快就開業兩年。商場揸fit人馮秀炎就趁apm兩歲生日，公佈商場業績。佢話apm踏入第二年，成績有進步，商場過去一年嘅全年人流8900萬人，比起第一年開業時已上升一成二，全年營業額有28億，升一成。
當然，要keep住消費者嘅注意，宣傳同推廣活動自然唔少得，大灑銀彈係攻勢之一，過去一年，apm已舉行過600幾個活動，最多人注意嘅人氣歌手簽唱會外，仲有藝術表現、文化展覽、應節活動、玩倒數等，使費成7500萬，使錢比起第一年用多咗一成。
為慶祝吓個商場搞得有聲有色，日前就請咗天王級巨星劉德華搞個簽唱會，就當係慶祝生日兼成績有進步。