花旗股市上禮拜五繼續急挫，仲係尾段插落去嗰隻，睇個款係早段托住嚟沽，如果真係咁，即係話之後仲要插，咁會唔會有反彈？梗會有，反覆下挫係大跌市嘅特色，因為咁樣先至可以消耗股民嘅資金，等佢哋輸得更慘。
個市跌得咁急咁勁，好多人都搵機會博反彈，現金越多嘅就越係咁諗，結果通常都係瓜多過菜，點解？因為喺大跌市裏面，最緊要係先睇大形勢，而唔係估幾時反彈，但係好多人都將焦點放喺反彈而唔係大勢，認為呢次重唔係一鋪發達嘅機會？結果多數會一鋪清袋，年輕嘅股民尤其要留意，佢哋見得風浪少，但貪婪、好勝嘅心就好強，通常會死快啲。俊樺都希望自己睇錯，咁樣大家可以再大炒特炒。
中石油P輪2177：花旗股市好唔掂，港股都好曳，碰啱股神畢菲特減持中石油（857），睇怕股價短線都幾難有運行，可以買啲中石油P輪2177短炒，博正股跌穿11.20元見10元。2177上禮拜五收88仙，有效槓桿率5.4倍，正股跌到10元，2177應該喺1.85元樓上，就算正股跌到10.50元，隻輪都有7成幾升幅，正股升破12.30元止蝕。