顧客本來係公司米飯班主，但有啲衰客經常借故退貨，搞搞震無幫襯，係唔係都投訴一餐，浪費公司資源。電訊業同銀行業人士話，只有30%顧客對公司盈利有貢獻，另外20%係會令公司蝕本嘅衰客，其餘50%介乎兩者之間。
美國大型電訊公司SprintNextel，由於不滿部份客戶經常致電客戶服務熱線，所以決定同1000個客解約，事件備受輿論譴責。著名網上銀行INGDirect亦不滿部份客戶太麻煩，幾乎每月都結束3000至4000個戶口。呢兩家公司「怒炒」客戶後，完全冇作出道歉。
服務衰客隨時蝕凸
其實，除咗呢兩家公司，仲有其他公司為咗唔同嘅原因，寧願做少啲生意都要趕客。KevJC喺《MSN討論區》話：「加拿大有家診所喺候診室寫住『肥人同煙民請勿幫襯』。」Alur講：「有個醫生由於不滿醫療保險賠償太少，連一個好老嘅病人都唔肯醫。」
PauletteG話：「有間銀行為咗節省成本，取消我個戶口，然後向我推介一個服務質素差啲嘅戶口。」darkfrequency回應：「如果畀着係我，一定會向銀行主任投訴，叫佢唔好取消呢個戶口，否則我會提走其他戶口嘅存款，走去幫襯其他銀行。」
AmI30Already認為：「俾電話公司取消戶口，其實係好事，因為唔使畀解約費，就可以跳槽去其他電話公司。」