上市公司重唔重視股民，睇每年嘅股東大會就知，有啲揀喺冇雷公咁遠嘅地點搞，又冇交通安排，或者匆匆開完就閃，即係叫班股東咪鬼嚟；有啲趁股東大會同一班股東任食任飲大玩一餐，只驚你唔嚟，好似香港小輪（050）今年再喺「洋紫荊號」搞股東大食會、生力啤（236）以前會喺酒廠搞股東任飲大會，雅居樂（3383）上年都學港燈（006），喺酒店搞自助餐股東大會。嚟緊呢個禮拜四，查懋聲家族揸弗嘅香港興業（480），請股東去愉景灣玩番吓。
香港興業嘅股東大會今年有新意思，向股東發送邀請函，裏面包括來回愉景灣嘅船票，不過股東大會唔係喺嗰度舉行噃。
股東開會會先喺中環四季酒店舉行，跟住安排專車接載股東由酒店到往愉景灣嘅中環3號碼頭（雖然行都行得到去），到愉景灣唔使怕悶，因為會有一個小時嘅導賞團，仲會去環海露天嘅美食區「水滸坊」食吓嘢。