澳門街朋友Ｍ來港小住，見到左丁山，問左丁山最近有冇去澳門見識吓啲新賭場，就快有「威尼斯人」開幕嘞，靚得好緊要，叫左丁山唔住都去參觀吓。哈，第二間唔識，偏偏「威尼斯人」就識，左丁山去拉斯維加斯之時，慕其名而入住，裏面真係大得驚人，成三千間房，要管理得亁淨企理，相當唔容易，澳門「威尼斯人」係拉斯維加斯之翻版，聽講係完全一模一樣。朋友Ｍ話：「係呀，澳門各酒店周圍搶管理人員，邊度有咁多吖，咪過嚟香港搶囉，你話嘞，除咗威尼斯人之外，仲有MGM，淨係請打理房間嘅阿嬸、清潔工、管房經理與櫃枱人員（frontoffice）都要成千人啦。」咁就唔止澳門酒店頭痛，連香港酒店都頭痛埋，澳門酒店過江搶人，薪酬可以加一倍，問香港啲酒店點頂？
朋友Ｍ講：「其實我哋都有隱憂嘅，呢排啲貴賓廳生意好唔掂。內地嚴格限制商務簽證到澳門，自由行簽證唔准港澳兩地遊，到香港就唔可以過澳門。以前大量內地賭客借口到香港遊覽，跟住過大海賭餐懵，然後坐船返香港去羅湖過境，好方便。𠵱家唔係噃，啲貴賓廳大戶明知申請澳門自由行簽證，好容易畀人昅到實，咪嚟少好多囉。」
唔怪得最近有報道話威尼斯人、永利等減少貴賓廳賭枱，主攻散戶。拉斯維加斯各大賭場之內，貴賓廳其實唔多，內裏賭客主要係亞洲人，而且貴賓廳內亦限紅幾嚴吓㖭，超過五萬美元嘅賭注未必肯受。朋友Ｍ話：「美國賭場注重散客，因為山大斬埋有柴，散客十個有九點九個輸錢，但大賭客就唔同，多數係經驗豐富之輩，狠狠地與賭場玩一鋪，夠運嘅話，可以贏賭場好多錢，詹培忠咪試過贏得好勁囉。賭場與大客對賭，冇絕對贏錢嘅把握，但澳門舊賭場有好多賭廳判咗出去，係要搵大客嚟賭啫，但弊在現時大客罕至，經營貴賓賭廳者，無不叫苦。」澳門賭場咁興旺，靠晒自由行，大量中國人民金錢，流入賭場口袋，其中不少係公款，你估中央唔知咩，點都要限制吓嘅啫。