劉德華昨日在觀塘宣傳國語碟《一隻牛的異想世界》，在大會安排下，平日勤力如牛的華仔變成皇帝，還獲五位性感「牛女郎」獻吻，令他滿臉唇印，非常香艷。
劉德華昨日在觀塘一商場舉行「劉德華一隻牛的異想世界簽名會」，吸引3,000市民圍觀，場面墟冚。華仔坐着價值80萬的開篷跑車進場，還獲五位性感牛女郎吻臉，身形比他高大的女模對他又攬又錫，又從後熊抱送波餅，見華仔狀甚陶醉，但卻不敢正視靚女們的身材，只用英文大讚她們「SoSweet」。
笑言想嘴對嘴
訪問時，華仔大讚模特兒靚女，他說：「如果唔係今日病，我就嘴對嘴啦！呢啲係友誼之吻。」談到不敢望着女模的身材，他說：「點敢呀？俾你哋影兩張，我仲使做人？望樣都OK啦！」記者笑問被吻時有否幻想自己是皇帝？他說：「即係後宮三千？冇啦，呢啲只係異想世界。」
帶「囝囝」開騷
華仔的「兒子」牛公仔Andox昨日也有出場，向華仔送上「1」字，寓意唱片銷量第一。華仔和Andox在台上表演，歌迷不時大叫Andox，被「兒子」搶去風頭的華仔，即搞笑地說：「你哋望吓我啦！」又企圖叫「兒子」離台，他說：「你攰唔攰呀？使唔使入去休息呀？」
事後華仔說：「俾個仔搶鏡冇問題，9月內地巡迴演唱會都應該會帶埋佢去，睇吓佢表現點，跳舞跟到我個beat就得。」華仔還笑言Andox愛聽爵士樂，開始學鋼琴，稍後會安排他就讀名校。
採訪：王連連 攝影：陳順禎
