港股大升幾個月，恒指急衝上23000多點，大藍籌升親就十元八塊，股仔一郁就跳幾成，市勢火爆，1000個投資者中，有995個都知道唔會長升落去，調整隨時會出現。
大戶今次先將個市抽高幾千點，跟住又全方位造淡，調整冇千幾二千點，唔會收手。不過，現時未可以話牛市已死，只可以視為短期到頂，開始遲來的中期調整。狂牛在烈日當空下衝刺，氣羅氣喘，但身體仲好強壯，停下來唞一唞氣，甚至瞓番一覺，瞓醒後又可以再衝過。
港股得天獨厚，有內地條大水喉射住，家下市場由高位回落，唔少同胞已昅到實，等機會執平貨。大戶雖全力造淡，抽走廉價日圓資金，但此去彼來，北水南下，抵銷咗大部份衝擊，港股調整嘅幅度，會比其他地區為小，而個別「跑緊」嘅二三線股，只要幕後人有實力，又或者公司業績有支持，一樣會在大跌市中逆流而上。所以，大市雖開始調整，有排都未到底，但炒股唔炒市，繼續有效。
德發績優可持有
業績唔錯嘅德發集團（928），在上周五大跌市中，就有好突出表現，一度搶上1.73元，收1.66元，升0.12元，升幅7.8%，成交更大增到5000萬股。上月初推介德發，當時股價1.25元，以高價計，升幅已近4成，中線仍可繼續持有。
07年度（3月年結算），德發營業額19.43億元，升17.36%，盈利3.15億元，大升137.2%，每股盈利17.64仙，末期息2仙，全年共3仙。期內分佔聯營公司溢利1.14億元，上年度同期則虧蝕3575萬元。
集團主要經營製衣（ODM和OEM）和零售業務，期內服裝製造營業額18.53億元，增12%，而持有70%Mudd中國的零售業務則提供8900萬元收益。Mudd品牌有門市60間，分佈全國20個城市，期望現年度內將分店增至200間。
另外，集團在6月收購XXEZZ品牌的零售連鎖店90%權益，在中國東北地區各大城市有200家分店，計劃現年度增至300家，屆時XXEZZ和Mudd將合共有500家分店，成為集團未來盈利增長的主要動力。