法國國腳前鋒亨利喺今個夏天紅到爆，周不時做咗頭條人物，先係佢由效力咗8年嘅英超球隊阿仙奴過檔西甲勁旅巴塞隆拿，繼而同佢結婚4年嘅英國籍老婆妮高離婚；日前佢又上報，但呢單唔係好嘢，事關係佢個兩歲大嘅愛女廸雅，成為東歐綁架集團嘅綁架對象。
行街散步保鑣昅實
英國《世界新聞報》噚日爆料，話同媽媽妮高仲住喺英國倫敦嘅亨利囡囡廸雅，成為一個專向細路落手嘅羅馬尼亞綁架集團嘅目標；而亨利亦一早收到風，喺幾個月前就搵咗間保安公司幫手，派車喺佢屋企出面昅實。雖則亨利有備而戰，但班綁匪一於少理，而且仲諗住有所行動，亨利亦作出相應對策，搵保鑣24小時貼身保護廸雅。聽講𠵱家妮高同廸雅去散步，唔淨止佢哋兩母女，就連個保母，亦俾保鑣圍到密一密。
咁又係，亨利佢今個夏天由阿仙奴過檔巴塞，簽咗份周薪13萬鎊（約205萬港元）嘅4年合約；而同佢搞緊離婚妮高，保守估計分到佢1,000萬鎊身家，隨時做小富婆；更重要嘅係，亨利經已搬出咗英國嘅寓所去咗西班牙住，屋企冇個男人喺度，試問廸雅有乜辦法唔成為綁架目標呢？
家陣廸雅成為綁架集團嘅目標，唔怪得至日前幫巴塞喺蘇格蘭打咗兩場友賽嘅亨利，無論喺入波抑或助攻之後都冇乜表情，仲一副心事重重嘅樣子啦。但話時話，有時細路仔有事，有可能令一對喺感情上出現咗問題嘅夫婦，重新走返埋一齊；話唔埋呢單嘢令到亨利同妮高重修舊好，一家三口好似以前喺英超聯比賽時咁開心。