港人熱愛唱K，我自己有時聽到好歌都忍唔住哼番幾句，若然坐緊車都可以「一咪在手、唱唔停口」咁就VeryGood喇！日產部新Elgrand就出咗款特別版LoveMusicEdition，專為唱K發燒友而設，有咪、有芒兼全內櫳靚靚裝飾，興之所至大可泊埋一邊，當佢迷你私家K房唱餐飽！
記者：梁美甜
攝影：譚盈傑
模特兒：Wing、Penny（TheGroup）
鬧市開Show 睇得唔聽得
走到旺角鬧市，開晒車門同喇叭試呢部K車有幾得；咪講笑，Penny同阿Wing唱咗一陣已經有一大班人喪昅，事關大家只係見到佢哋揸住支咪望住車入面個芒，行遠兩步都已經聽唔到佢哋嘅歌聲同音樂聲，好奇心旺盛啲又夠求知慾嘅咪會走埋去睇吓發生咩事，如果唔係，就完全唔知兩位仁兄搞邊科。當日最搞笑嘅莫過於有兩位小妹妹誤會咗Penny係歌星，仲邊行埋佢度邊搵紙筆簽名，點知望真啲先至知係「老翻」，兩個人即時掉頭狂笑，我同攝影師都忍唔住笑咗出嚟，真係失禮晒！
10個喇叭聲夠靚
日產Elgrand不嬲都係名人藝員保母車熱門選擇，事關夠豪華又夠寬敞，開工擺大堆衫兼放Break攤唞都得，仲可以一次過載埋梳頭、化妝同助手，超方便。但無論部車幾舒服幾豪都好，若然有埋日產呢部特別版LoveMusicEdition，就隨時隨地都可以開唱KParty啦！
同音樂有關，佢副「裝備」自然有番咁上下，特別版包括一套私人Palace卡拉OK配BOSE音響系統，連埋Richboss超低音喇叭，成部車總共有成10個喇叭，配埋原廠9吋電動開合彩芒，放隻碟就隨時唱得，就算走到荒山野嶺都完全無影響。聽落好似好得，一於搵埋歌喉了得嘅Penny同阿Wing走出鬧市試吓呢副卡拉OK有幾得！
閂埋門做K房操歌
筆者雖然歌喉麻麻，不過都膽粗粗試唱一下；講真，喺車櫳入面唱歌真係好舒服好好玩，前後左右都有喇叭，音樂聲同自己把聲都清楚聽到，唔會咁易走音同甩Beat，想多啲人唱嘅話仲可以插多幾支咪，Maximum可以四人齊唱都得，如果大家唔怕嘈嘅話！成個「流動K房」最大問題係換碟，因為個碟盤喺車尾，即後排椅後面，你夠瘦又夠手長嘅咪唔使落車開尾門換碟囉，我自問身肥手短，無咁嘅本事喺車入面換碟，唱到興起惟有搓包剪囗睇吓邊個負責去換碟，話唔掃興就呃你啦！不過始終係部車，質素係咁，歌星或K癮之人操歌過吓癮就絕對無問題。
鑲滿水晶閃到爆
叫得特別版，除咗有卡拉OK裝置之外，當然有其他特別配套啦；就係成部車都鑲咗好多Swarovski水晶。好似車頭有個鑲滿咗Swarovski水晶石嘅日產徽章，全車座椅換咗英式皮椅，表面仲鑲咗五大粒水晶鈕釦，而車廂柱位亦包上銀色花紋皮套，就連倒後鏡都鑲邊加埋吊飾，咁都咪夠；最誇張係個波棍，整個波棍頭都鑲滿了晶石，閃到你暈！講真座椅真係好舒服，又軟又夠，成個人可似嵌咗落張椅度，如果嗰幾粒石可以裝係啲穴位位置嘅話就仲正，因為可以隨時做埋Massage吖嘛，爽！
日產Elgrand「LoveMusicEdition」規格
引擎： 3,498c.c.V6汽缸24氣閥，DOHC連CVTC
馬力： 240ps/6,000rpm
扭力： 36.0kg-m/3,200rpm
傳動： 電子控制5前速自動波箱
附手動+/-模式
查詢： 合誠汽車（28035333）
