小B今年自芝加哥大學畢業，六月舉行畢業禮後，與父母返回多倫多老家，話要休息躲懶三個月，先至搵工。小B在芝大修讀經濟與社會學，理論多多，好幾位同學已經去咗華爾街啲大投資銀行返工，小B大概讀得福柯多，不為金錢所動，話明冇興趣做投資銀行，或者會考讀法律學院喎。
休息期間，碰上外公過身，小B與父母回港奔喪，索性喺香港住兩個月，與啲表親及同學玩多啲。佢有幾位芝大嘅香港、新加坡、大陸同學在香港做工，搵人飲茶、食飯，不愁寂寞。小B話一位同學在大型投資銀行做咗兩年，不分日夜坐在電腦前計數，做PowerPoint，寫上司畀料嘅pitchbook，久而久之，自覺大腦停頓，唔識思考，索性辭職轉往顧問公司，人工少一大半，花紅更加差幾皮。小B問同學：「少咁多錢，唔肉赤咩？」同學話：「肉赤都好過冇咗半邊腦。現在為客戶諗策略，腦筋逐漸返晒嚟。」小B與班相熟嘅芝加哥同學，都係廿零歲女孩，前途大把，唔緊張搵大錢住。
問小B：「點解你哋考入投資銀行，好似幾容易？」小B話：「英文好，人人都好。但我哋個個慣咗在課堂上辯論，讀經濟系成日見到啲大師，如GaryBecker、如我嘅老師StevenLevitt。所以到去見工時，一定唔會口震震。再者，我哋在學校已經操練考工方法，例如IQ題、邏輯推理題、解決方法（problemsolving）等等，全部滾瓜爛熟，去大公司考筆試，如斬瓜切菜。」
係噃，未操過，好蝕底。肥仔K喺六月底在東京參加「招聘博覽」，去幾間大公司筆試、面試，畀人一棍掃出嚟，份份見工都冇行。小B話：「肥仔K讀書從來唔考究考試方法，完全唔識考試技巧，一味就係寫長篇大論，去見工，好吃虧啫，只要佢考多幾次，磨利把口，就會唔同晒。」
讀書與見工係兩回事，見工嘅筆試與口試講究技術，與讀書叻唔叻無甚關係嘅。