動畫《阿森一族大電影》(TheSimpsonsMovie)開拍以來，故事包得極為密實，無論從預告片到創作人MattGroening嘅訪問，都唔肯洩露半句古仔講乜。不過從電視版18年來嘅劇情，再加上江湖傳聞推斷，我哋都大概估到今次阿森一家發生乜嘢事。 撰文：戶川淳
下月9日上映嘅《阿森一族大電影》，改編自風靡全球嘅電視動畫係人都知，但齣戲究竟講乜，就係超級大秘密。其實創作人MattGroening並唔係專登吊大家癮，而係佢認為觀眾平時睇電視版，事前都唔會深究古仔，因此電影版亦應該一樣，咁先有驚喜。
傳言四起
不過18年來《阿森》嘅劇情都離唔開幾個模式，例如大仔巴特（Bart）惹上大麻煩、聰明女麗莎（Lisa）牽涉入政治事件、巴特全家去旅行等，而發生得最多就係老竇荷馬（Homer）工作失當搞出大頭佛。網上傳聞今次又係荷馬搞出禍，引發空前環境災難，當中牽涉新加入嘅寵物豬仔、頭大冇腦嘅阿諾總統、陰濕嘅環境部長等，不過最後春日市梗係有驚無險。
好多人都問，《阿森》播咗接近五分一個世紀，點解𠵱家先推出電影版？其實劇集於89年播出第一季後，Matt已經構思電影版，但當時佢想搞好電視版先再算。到咗第4季，Matt又重燃製作電影版嘅念頭，但寫出嚟嘅劇本唔夠水準。到咗2001年，當幾位主要配音員簽下電影版合約後，籌備正式展開，Matt更喺歷年來眾多編劇中，挑選七位精英中嘅精英，加上四位監製，組成最強嘅11人創作團隊，再經過六個月嘅磨合，先開始為電影撰寫第一稿。
貼近時事
齣戲另一特點，係唔隨波逐流玩CG，堅持用2D製作，好處係技術上易處理，可以邊畫邊改古仔。據知齣戲到今年年初劇本都日日改緊，每個細節及大小笑位都經過數百次調校，以達至最好笑最貼近時事。聽講被刪減嘅角色同情節足夠製作多兩部長片，仲有歷年電視出現過嘅約320位角色都全部會登場。
創意小八卦：宣傳攻勢夠噱頭
《阿森》故事搞鬼，今次電影宣傳手法亦十分玩嘢，首先電影公司搞票選，從美國15個真正嘅春田市入面揀一個搞大型首映，結果東北部佛蒙特州勝出。另外又將美國12間「7-11」改裝成故事中嘅「Kwik-E-Mart」便利店。上星期仲勁，佢哋喺英國草原上畫上巨型荷馬肖像扮麥田圖案，創意贏晒。