全城熱爆！咁熱嘅天氣真係攞人命，想慳冷氣錢又想透心凉，好多人都選擇去到各大商場嘆吓冷氣，行街兼消磨時間。今日我哋就走訪過港九8大商場，拎支溫度計度一度，睇睇邊個商場最凉爽，跟住去蒲最透心凉！
記者：許福合 攝影：陳偉強
ImageGirl：Mandy
九龍區
Top1 德福冷氣最勁
德福商場雖然開得耐，不過保護管理相當唔錯，而冷氣可能因開放式設計，近門口有啲唔夠凍，接近25℃。如果想嘆冷氣，可以上2期，溫度低見24℃。
Top2 megaBOX外熱內冷
九龍megaBOX雖然外表火紅，不過原來係外熱內冷，唔少網友都提過呢度冷氣「好得」！我哋入去走一轉，的確有透心凉嘅感覺，去到人流較少角落，溫度曾低見25℃。住喺九龍灣就有福喇！得閒去嘆一嘆，冷氣費真係慳唔少。
Top3 海港城熱在人多
海港城本來冷氣夠勁，但衰在人氣高熱度都高，行到去邊都係人，一般可見26.5℃。好彩仍算亁爽無滴汗！
Top4 apm人流密集
唔知係咪apm近觀塘工業區，平均溫度高咗啲，加上人流密集，感覺冷氣有啲弱。拎出溫度計睇一睇，果然高至28℃。
香港區
Top1 太古廣場溫度適中
香港區商場平均溫度較高，其中金鐘太古廣場集合唔少名店，要招呼呢班貴客溫度自然要適中。平均有26℃左右，而且設有唔少座椅，拎本雜誌來睇，就可以消磨一個下午。
Top2 太古城人少好行
太古城地方大人流唔算密集，行得舒服之餘，溫度亦只係26.5℃，再去買杯冰凉飲品，就夠晒爽！
Top3 ifc金融中心
ifc叫得國際金融中心，自然多白領出出入入，不過冷氣唔算特別勁，平均都有27℃，真係怕西裝友行到出汗！行近四季酒店一邊，溫度亦見27℃。
Top4 SOGO行到熱
SOGO位置係人流熱點，行到標汗雖然都叫可以過冷河，但仍然覺得冷氣唔夠力，最高溫度見過28℃，真係熱！
