昨日在「不累死也遲早拗柴」欄內指，撐住美國經濟的兩條腿跛了一條（樓市），另一條可不能跛，然則見到周三美股被力壓，每見「藍」都被扑番落水底，若不是近尾市力托3隻大價股，又怎能力保不失？
見「無形之手」托到索晒氣，心感不妙，一定要提醒讀者個市有點唔妥，但又唔知幾時會「冧」，便寫：得單一隻腳，又要跳，又要踢，不累死也遲早「拗柴」，以表憂慮。
豈料話口未完，美股便跌個四腳朝天。道指前日最多跌過450點，收市前又係力托，但亦要跌311點或2.26%；標普500指數跌幅更大，插穿1500點關口，收報1482點，跌了35.43點或2.33%；納指跌幅最細，亦蒸發了1.84%。
其實，美股之急挫，是本欄忠實讀者的話，應已意識到有點手影。周三欄：「無形之手」是見風頭火勢暫時縮手，等機會大踢一腳，抑或真係消失於無形，此話可有啓示，按這幾日的走勢而言，看來真是有點累了！
然而，大家千萬別以為美股從此「收皮」。在英明神武的喬治布殊總統領導下，又怎能讓自己「跪低」？身邊猛將如雲，個個文韜武略，只要腦袋一結合，相信又可化腐朽為神奇，啥困難也可迎刃而解。不然豈不功虧一簣？
如果冠一估計不差，布殊政府必定將計就計，利用次按危機蔓延，從而讓其將股市「隊冧」，在人心惶惶、全球（股市）草木皆兵的情況下，資金往那裏「灣水」避風？已不必在下喋喋矣！
明知大把浮息按揭快將到期，這利率又豈能上升？難道想數以百萬人無家可歸乎？如此這般，聯儲局便大有藉口減息，信焉？
那麼股市又何去何從？不妨自己用個腦諗吓啦！