陳奕迅（Eason）昨日33歲牛一，其生日節目竟是荷包出血加擦蠔補身。前晚Eason嫂徐濠縈以粉紅神婆潮look出席miumiu活動，自爆近日在英國遺失價值逾萬元的婚戒，其後她偕丈夫到跑馬地蠔吧開P，獲群星賀壽的Eason仍盡興狂歡，隊酒擦蠔，結果劈到變爛泥，要走後巷竄縮的士車廂鬆人。
陳奕迅前晚在跑馬地Oyster蠔吧包場舉行生日會，其妻徐濠縈偕大班圈中好友包括黃偉文、蘇永康、馮德倫、房祖名、陳子聰和太太何超儀、梁漢文與女友Karen等，為他慶祝33歲生日，眾人劈酒擦蠔，狂歡至近凌晨4時仍意猶未盡，要轉場再玩過。
梁漢文又飲醉
前晚眾星半夜前已到場開P，凌晨2時後各自離開時，大多保持清醒，惟獨梁漢文變醉貓，一味儍笑，要友人攙扶上車。其後徐濠縈與陳子聰及三名男子搭的士先走，徐與兩男坐後排，勁大嚿的陳子聰最遲迫上車，卻擠到關不到車門，徐和友人見狀即時大笑，陳子聰要再迫一次才閂到門，不禁尷尬而笑。
同時間，戴黑超的Eason、房祖名和馮德倫從後巷竄離，火速乘的士離開，Eason劈到醉如爛泥、神情呆滯，有如一條無骨魚般滑下身子，他與坐在身旁的馮德倫俱沒扣上安全帶，由於壽星仔尚有節目，為阻記者追訪，竟着食肆職員阻攔採訪車。
其實前晚徐濠縈也走兩場，她開P前先到尖沙嘴出席miumiu時裝店開幕，以一身粉紅神婆潮look示人。剛到英國探望Eason母親的她被問及會送甚麼禮物給老公時，竟自爆遺失價值約10,000元的結婚戒指，她說：「好慘呀，我喺英國唔見咗隻結婚戒指，應該係佢最好嘅生日禮物。」
做媽媽記性差
徐濠縈謂囡囡康堤經常要求玩戒指，她說：「我除低咗畀佢玩，玩完就唔見咗，問阿囡佢又陰陰嘴笑，隻戒指咁粗，唔怕佢食咗，我怕佢冲咗落廁所咋。」她聲稱丈夫未有為此生氣，因對方知她生女後記性變差，她笑說：「我有同佢講，我冇唔記得個女已經好叻。」
採訪、攝影：娛樂突發組、林妙萍、陳順禎
