電視上經常看到介紹日本麵食的節目，由湯底、麵質到材料詳細解構，睇見都流晒口水！想想其實小小的香港也有許多美味麵食，牛腩、雲吞、蝦子呢啲固然想食就有，連鮑魚、大地魚麵都搵得到；而且放湯亁撈，應有盡有！今日就等小記做個「土炮麵食達人」，將十幾款本港出色的中式麵食介紹畀大家啦！
記者：馮冠芝
攝影：陳偉強、楊錦文、梁細權
Model：Michelle
撈麵專家伴湯勁香濃
第一站嚟到撈麵專門店，門外已聞到一陣熟悉的「細蓉」湯味──來自撈麵附贈的伴湯！老闆楊生以祖傳方法，以大地魚、蝦米、豬骨煲3個鐘，味道唔濃至奇。呷一口，鮮得嚟，居然有股甘甜如清露般滋潤喉嚨，原來還加了秘密武器：羅漢果，難怪湯味鮮甜，飲多幾碗都不會渴呢！
黃金大地魚香撈麵 $18
當大家以為大地魚只可用作煲雲吞麵湯底時，楊生卻在上環購入百多元一斤的上等大地魚亁，磨成粉狀撈麵。大地魚粉散落在每條麵上，咬一口，甘香美味，與生麵的蛋香相得益彰。
鮮牛肉撈麵 $18
鮮牛肉腍口唔黐牙，用最簡單的調味，保留牛肉原汁原味。沒有多餘醬料，赤裸裸的生麵卻沒丁點鹼水味，只有蛋香味，牛肉爽麵彈牙，眨眼間已吃清光。
黑牛百葉撈麵 $18
只用鹽糖略醃的新鮮牛百葉，爽口彈牙得嚟原汁原味。若驚佢有少少腥，可配上楊生秘製的辣椒油，以指天椒亁、生油等醬料猛火煮1小時，辣椒油煮到起沙，又香又辣，正！
袁小姐：「吃了大地魚撈麵，啲麵冇鹼水味，湯飲完都唔口渴，好甘甜！」
楊記麵家（25111336）
地址：灣仔軒尼詩道219號地下
營業時間：
11:00a.m-10:00p.m
交通：灣仔地鐵站A2出口向左行約5分鐘
新派傳統一次食勻
位於灣仔相連的麵食姊妹店，狀元賣的是擔擔麵、喇沙；味皇就賣魚蛋牛腩粉，新派或傳統之味，任君選擇。
鮑魚QQ粉（狀元） $28
由狀元麵家自家設計的QQ粉，晶瑩通透，佢吸晒湯的鮮味，又唔會發脹，保留近似薯粉的煙韌，令人食唔停口。最緊要還是以雞、豬骨、娃娃菜、雲腿，以文火煲7小時的清湯底，味道活似媽媽在家煲的足料雞湯！娃娃菜的清甜配上雞的鮮嫩，當老火湯飲都不為過！鮑魚雖是罐頭貨，但都好鮮甜。
魚皇五寶河（味皇） $21
$21蚊一碗粉，竟然有魚蛋、魚片頭、魚皮餃、醬爆鯊魚丸、蒜香魚皮為料！魚片頭香口魚味濃，魚皮採用龍脷魚皮，不會捲埋一嚿，炸醬薄薄一層平均分佈，香脆鬆化，再加上蒜香調味，難怪成為味皇王牌。
牛皇三寶河（味皇） $21
三寶係牛腩、醬爆牛丸、粗筋牛丸。湯底是香濃滷水，柱侯味四溢，牛味濃而不羶，秘技在於湯底加了新鮮橙皮！牛腩腍，牛筋丸則有咬口，好過癮！
Ruby（左）：「魚皮好有蒜香味，好好食！」
Ann（右）：「魚蛋粉湯底夠濃，成碗食晒,湯都飲埋㗎！」
味皇魚蛋粉、狀元麵館
地址：灣仔軒尼詩道184-186號地下
電話：28921202
營業時間：11:00a.m-11:00p.m（味皇）、7:00a.m-11:00p.m（狀元）
交通：灣仔地鐵站A4出口轉右步行約5分鐘
原隻鮮蝦麵 手快有手慢冇
鮮蝦仁冬菇麵（限量供應） $21
原隻鮮蝦仁雲吞麵有無嘆過？仲要係成$40蚊一斤的新鮮海蝦，咬一啖，那種鮮甜爽脆騙不了人！跟那以蠔油燜了個多小時，入晒味的冬菇襯到絕，菇、蝦兩者令湯底鮮甜無比！不過，想食要快手，遲來者下次請早！
蝦子撈麵 $24
老闆精挑細選，找到斗門蝦子，貪佢甘香，鮮得嚟無腥味！配以老闆以最傳統的竹升「un」麵，彈牙得嚟一定無鹼水味，仲要有蛋香！蝦子爽，竹升麵彈，兩者於口中跳來跳去，感覺調皮！
劉森記麵家（23863533）
地址：深水埗桂林街48號
營業時間：12:00n.n-2:15a.m
交通：深水埗地鐵站D2出口直行約3分鐘
珍藏肉汁襯爽口麵條
紅燒牛肉麵 $28
出色的牛肉麵館，必有一煲珍藏滷水肉汁。西門町也不例外，用珍藏滷水汁將牛𦟌燜2小時，牛筋腍到唔使𡁻！湯底以豬、雞骨由早煲到晚，再配上牛肉汁，襯埋爽口麵條，超好食！
台灣擔仔新竹米粉 $22
新竹米粉幼嫩爽口，浸久了湯依然唔會太腍！肉臊味濃，新竹米粉吸走部份味，鹹得啱啱好！
西門町台灣麵食（23324673）
地址：旺角通菜街2號鴻光大廈2N號舖
營業時間：11:30a.m-11:30p.m
交通：油麻地地鐵站A2出口，家樂商場轉左進入女人街直行。
魚片頭甘香彈牙
蒜香魚蛋魚片頭河 $14
魚片頭係將一條長魚蛋切成三角形，片頭四面皆炸至金黃色，香口彈牙，且魚蛋加了蒜油打成，特別香！
鮮蝦雲吞麵 $14
大大粒雲吞，一粒有兩隻蝦！那大地魚湯底香味與別不同，原來在於老闆父親所教授的秘技：芝麻粉！
益食家（27167079）
地址：九龍城啓德道17號
營業時間：7:30a.m-3:00a.m
交通：舊機場對面