近日頗多上市公司聲稱賣盤或者賣殼，從事家電生產嘅百靈達（2326）日前復牌，宣佈大股東擬將部份或全部股份轉售予一名潛在買家，而潛在買家已將定金存放於信託付出代理人。呢間公司上月剛公佈業績轉虧為盈，賺1300多萬元，同一時間，其股價已由兩個多月前的0.70元，升至昨最高7.97元，市值增至17多億元，一話賣盤，真係「聲價十倍」？
殼價已嚴重偏高
賣盤之後，新買家係乜底細當然最重要，但對於無乜內線消息嘅散戶而言，跟炒其實係一場賭博。急升前百靈達市值僅1億多元，要吸引買家唔難，不過炒至現價，投資者若在市場買貨，便要冒險以10多億元溢價，博新大股東有優質項目注入上市公司，呢10多億溢價，同賭翔龍基金（820）班芬佬會幫散戶賺硬5成，其實分別唔大。同類個案係工業股仔旺城（2389），公佈擬賣盤後成1個月都未有消息，其間股價卻已升咗兩倍幾，都唔知仲有無下文。
比起以上公司話到明賣殼，華園（2349）的變相賣殼行動就含蓄得多。集團月前向中國水務（855）以總代價2億元，收購其持有的沙棘業務，或稱高原聖果。華園按每股0.15元配發1.33億股新股予中國水務，用以支付10%的代價，其餘透過發行CB支付，行使價都係0.15元，比現價折讓超過9成。
中國水務在配股後持有華園約19.4%，若CB悉數行使，將可換取華園已擴大後發行股本68.44%，華園變相賣殼予中國水務，而中國水務則透過華園分拆其沙棘業務。周二華園原大股東之一以1.33元配售8700萬股，在CB行使前偷步套現，看來是鋪路逐步淡出。