前港大醫學院院長林兆鑫SK因為涉及私家症收費問題辭職後，喺名醫雲集嘅中環中建大廈開檔，噚日搞開幕酒會。佢貴為前特首「御醫」，好多政商醫學界名人畀面出席。俾美國證監會咬實唔放嘅李國寶同太太潘金翠拍拖現身，捐過好多錢畀港大醫學院嘅電器大王蒙民偉、胡官、利孝和夫人等前後腳到。
花百萬裝修診所
老董冇到，由董太做代表；骨科專科醫生方津生、四肢癱瘓阿斌嘅前主診醫生潘德鄰都有到賀，一眾新知舊雨花牌花籃擺滿成條走廊，好墟冚，不過好似獨缺李首富，話晒SK任內玉成10億捐款，連醫學院個名都改埋喎。
SK可能想專心招呼老友，費時俾記者追問佢，據講一早吩咐實Q，閒人免進，更加唔可以俾記者影到佢相，所以雖然佢打開門口做生意，但係開埋診所旁邊道後門，畀自己同嘉賓走後門鬆人。有到賀嘉賓同八方講，SK噚日神態自若，神采飛揚，似乎冇放私症單案上心。SK間診所面積約1,000平方呎，有兩個診療室，一個畀VIP，一個畀普通病人，裝修估計要100萬，喺中環唔算好豪，買胃鏡同直腸鏡等儀器大約200萬，較特別係佢睇症時要坐張珍藏酸枝凳，院長排場不變。