07動漫節早就變成Figure同靚女天下，本以為睇黃馬兩幫死硬派鬥排長龍過癮，點知XBoxGirl大戰10位GameGirl仲吸引。會場東面，換上冰藍制服嘅GameGirl叫人期待，豈料西面擺陣嘅XBox派出迷彩露背女郎打游擊，成功搶盡影友歡心。GameGirl首回合雖然落敗，但對於入場人士嚟講唔緊要，因為個個大讚今日Enjoy過睇港姐！
記者︰張一豪、許維雅、陸俊雄
攝影︰周旭文、陳陶鈞、楊錦文
GameGirl冷清
其他靚女
自由行慕名而來
陳先生：「我噚日由東莞落嚟自由行，因為香港漫畫節十分出名，所以專誠過嚟睇吓，我無打機，頭先見個女仔幾靚同佢合照，亦無特別要指定買乜嘢精品，不過會四圍睇睇，買一啲紀念品。」
扭動纖腰
影友圍20分鐘
10位GameGirl，早上11點開幕禮過後有如受保護動物，遲遲未現身。結果XBox迷彩大露背Chemain和火紅TubeTop阿Ka一到，吸引大批影友包圍喪影至少20分鐘。小記幾經辛苦搵公關幫手，先拉到佢哋埋一邊傾兩句。Chemain︰「年年動漫節都有嚟，但第一次幫XBox手。可能今日着少布咗，大家先咁留意我。」至於火紅阿Ka雖說話較Cool，但一扭纖腰，出動長腿，影友已暈得一陣陣。到大約12點半，大會GameGirl終於上台自我介紹，仲開始進行天才表演。但觀眾想埋少少影相都難，事關被離台十幾米嘅鐵欄隔住。面對XBox、瑞華行等靚女親民策略，GameGirl先輸一仗！
Cosplay大熱獨眼亞紀人
動漫節總係Cosplay迷年度盛事，今年亦不例外，通街四處都有人化身漫畫、遊戲角色。當中以《飛輪少年》內的角色最熱，最多人扮演，難怪全場都見獨眼龍周圍走，原來係亞紀人角色上身。
Game攤位人氣勁旺
除咗兩家大漫畫公司銷情暢旺外，原來今年網上遊戲亦發大財。當中視事先張揚由$500炒至$9,000，越一科技（U1）網絡遊戲《小鬥士大冒險》限量只有3個嘅特別版廸倫首辦公仔，由梁小朋友連同朋友一齊買起，佢表示01年已經開始玩呢個Game。問佢會唔會賣，佢話「要睇心情」，計我話：唯一可以改變佢心情嘅，應該係炒賣嘅價錢。
另外主力做兩個Online遊戲《古龍群俠傳》同埋《勁舞團》嘅「gameone」，亦出現「打蛇餅」嘅情況，原來好多人都係為咗《古龍》限量800套嘅《群龍大事記》而嚟，每套$500，因為收錄由第一代至Ver.9.0以來，《古龍》6年間開發資料，及眾多網友嘅自創人物同招式，對玩開嘅人來講別具紀念價值，一個人買3套大有人在。
天下Fans最忠心
要數全場最瘋狂掃貨檔口，非天下莫屬，就連排第一的莫先生都係為咗買13吋「摩訶無量」步驚雲首辦！訪問咗幾位Fans，原來天下粉絲多數係資深馬Sir追隨者，掃親都數袋，埋單以千計。不過莫先生入了2千幾蚊貨後，仍然訴苦：「出年我未必嚟排，大會安排一年比一年差，排到我好嬲。我下年寧願使橫手入去買，今年有唔少人都係咁！」
是日主角莫先生
由排隊到買完一小時都被記者瘋狂包圍，任何一個動作都有4部攝錄機、20部攝影機對住，是今日主角!
Jay
「由華英雄年代鍾意到𠵱家，而喜歡步驚雲嘅原因係覺得似自己，同樣亦正亦邪！」（吓……）
追馬38年！Leo
「入了$4,500貨，我由1969年迷馬Sir到𠵱家年年都幫襯。馬Sir直情係我嘅守護神。」
分組買快好多！陳先生
「我哋十個人嚟，每人預2,000蚊分頭行事，我負責買步驚雲首辦。一班人分頭買會快好多。」
爆料Fans蔡先生
「我畀玉皇朝搵咗幾年笨！明明話限量10隻，幾日後會場又見有得賣，失望，唔會再幫襯！天下均真好多，話十隻就十隻！」
玉皇朝傷健排頭位
雖然天下10分鐘賣晒摩訶無量，玉皇朝開波50分鐘仲剩4個火雲。但數首位從外面排隊入場，唔係上晒電視嘅莫生，而係傷健人士李生和高生，事關傷健人士有得優先進場。佢哋都係買《創世神兵》，而且仲係第一位得到黃玉郎親筆簽名，李生話︰「我今朝9點嚟排，冇另一邊咁誇張。上年都有嚟動漫節，今年係第一次排頭位仲拎到黃生簽名，特別開心。」
