人生有許多心跳時刻無法事前演練，如初戀、如會考放榜，你以為有晒心理準備，至發生一刻還是心跳無比。記得當年我放榜，張紙很大，行字好細，我望咗10秒，對眼都唔知Focus去邊，直至腳震震返位研究，哦，原來個分匿喺右下角。放榜心事，以下一干過來人都明，還專誠拍短片體貼你心情，後日起熱播幾個ShoppingMall，行過望望當飲定放榜心靈雞湯。
記者：劉嘉蕙 部份攝影：楊錦文
StellaSo 重讀學乖用亁顏料
StellaSo的短片一如她的漫畫作，本土色彩濃厚。片中主角在電車、天星小輪、火車上咪書場景，是不少考生寫照，「會考嗰時去邊都溫緊書，連去飲都帶埋本書，等上菜位攝時間刨多兩句。」
Stella將會考比喻為搶包山，無數人渴望分一杯羮，亦無數人埋門失手碌落山，「我考咗兩次會考，第1年有14分，但中文肥佬，惟有重讀。」搶遲一步，未必唔好，「重讀那年學得更多，有了經驗，終於明白考試成敗憑計算，以考美術為例，會考是潮濕季節，用廣告彩等濕顏料冇着數，第二年再考學精了，就多帶亁顏料，又事先多設計幾個範本，應考時不必再花時間想。」第二年重考，她有16分，中文終於有C，美術仲有A，考理工讀設計都靠佢。
Stella說，做人任何時候都要居安思危，「過了會考一關，後面還有許多人生課程，你唔知幾時失手，所以凡事最緊要作好最壞打算。」
《平安分》
StellaSo話會考如搶包山，各路人馬不惜一切向上爬爬爬，但搶到又如何？攞到14分「平安分」就真的只有「平安啲囉」。因為搶完一個包山，又到下一個山，一山還有一山高。
伍尚豪 白面書生「焗」你攞A
伍尚豪穿了為今次短片設計的「白面書生」造型Tee，「讀到面無血色，又戴勁大眼鏡。」這也恰如他當年，「我是勤力但考得唔好的類型，會考得15分，可幸全部及格，現在回頭想，我其實係揀錯科，那時怕文科冇男仔讀，揀了理科，後來才發覺錯晒……冇男仔讀其實仲好！哈哈！」
升不上中六，他去讀沙田TI（即今IVE），因禍得福發展心頭好。他每畫好一個公仔，便整一系列Product印Tee着上身，採訪當日興奮示眾，「人生唔係得一條路，像我冇預科收，在無乜選擇之下讀設計，𠵱家咪幾好！」他說，會考成績有太多影響因素，一時得失毋須過份介懷，即使考得好，亦要記住一山還有一山高，「對十幾歲人來說，會考成績重要，但出來工作之後，根本無人會問你會考成績，亦無人問你攞畢業證書睇，往後的人生都是憑自己去面對。」
《滿分先生》
麵包先生潛心閉門造A型包，開頭似隻象，屢敗屢戰，最終百扭成A，滿心歡喜以為只此一家，怎料步出屋外，發覺人人皆A。又如何呢？自己開心就好。
葉念琛 做人有分數
會考計分制，A5B4C3D2E1，計最高分6科，你識，你阿媽識唔識？導演葉念琛將放榜母子情帶到片中，「你問會考生預自己拎幾分，佢答你10分8分，你問阿媽預個仔幾多分，佢會答5、60分，諗住及格吖嘛。」葉念琛說。試映會上，阿媽對白一出，Gag中帶真實，全場心領神會，拍掌大笑。
阿仔一個分，阿媽一個分，葉念琛說最緊要是馬上打畀阿媽，他憶述當年穩穩陣陣拿了18分，「其實放榜只在乎升唔升到中六，見分數達標已可以去玩。」咁你即刻去咗玩？「哦，唔係，辦完手續先玩。」做事分晒先後，葉導演果然有分數。
《我有分數》
葉念琛嘗試以DocuDrama形式紀錄放榜前夕母子心情，簡單三問三答加一小段母子對話。「我沒有放音樂，反而多收一條環境聲，加強真實感。」母親壓軸一句「最緊要返嚟食飯。」延續導演一貫窩心風格。
袁建滔 20分唔收跳出齋校
麥兜導演袁建滔讀書比麥兜叻，會考有2B4C，不過升不上原校中六，他自言打擊超大，「我之前讀男校，中六男女校，整個文科班得5個男仔，好似女校男生，好大文化衝擊。」做女校男生豈不爽哉？「唔好！20年前好乖好純，冇K唱，落Disco就叫好壞，我唔識同阿媽及家姐以外嘅女性溝通㗎。」
年年看新聞，會考生撲學校撲餐死，袁建滔之前亦毫無心理準備，「原校唔收，我想起返屋企經過有個泳池，附近有兩間學校，就膽粗粗走去試，居然收，辦好手續，當天下午就跟家姐去睇《英雄本色》。」袁建滔說會考成功與否都是好經驗一場，這次短片，他用「疾走點點人」比喻考生，為了考好場試橫衝直撞，最後攞到3分，一樣興高采烈，「其實真的不用介意分數。」
《疾走森林》
會考之路荊棘滿途，見路，跑！見箭，擋！見飛機，上！見飛彈，射！越過高山又越過谷，疾走一場人生不枉過，30分與3分同樣值得慶賀。
林二汶 肥妹空想無行動
二汶的短片中有個肥妹，只會空想成果缺乏行動，她說這是年輕人的寫照，「有夢想而無行動，最後一場空，唉，其實我自己都係咁。」她希望透過短片勉勵他人，也勉勵自己，「最緊要TakeAction呀！」她說自己當年會考也如在夢中，「考之前幻想會攞好多A，又懶又唔肯背ModelAnswers，結果考兩年都麻麻哋。」她第1年考到6分，第2年自修有9分，想讀演藝讀唔到，兜兜轉轉念了繙譯文憑，現在組成跟繙譯毫不相干的at17，「人生路上自有際遇，會考成績其實唔係咁重要。」
《肥妹與脂脂肪肪》
肥妹幻想一粒種子可種出餐蛋飯，空有想法卻久未行動，魔鬼肥妹趁此時將種子搶走，結果無人得到餐蛋飯！全段片最Like二汶親身聲演有歌聽。
應屆會考生之選
「0-30無分高下會考獨立短片」由香港藝術中心、可口可樂及麥肯廣告聯合炮製，15個HappyAngels位位出師有名，當中不乏獨立短片比賽ifva冠軍人馬。即拉應屆會考生崔bee與柴竣揀邊條係心水。
會考心路有Mood
「導演孫嘉毅出賣私伙初戀故事，重溯當年會考心路，短片《Innocent》講述自己如何從零分小子變有為導演，更情商初戀女友借出成績單當道具。短片拍得勁靚勁有Mood，故事簡單而深刻。」
好過睇星期日檔案
「《拾分者》講70歲伯伯林強考30年會考，視之為人生最大興趣，日常愛曬成績單免生蟲，會考書堆滿一屋，引來執紙皮婆婆眼紅。故事搞笑，假得嚟幾真，放榜前睇咗當減壓，好過睇星期日檔案。」
「0-30無分高下會考獨立短片」
放映日期：30/7起播放
播放點：銅鑼灣地帶、東角駅、apm、旺角地鐵站、尖沙嘴地鐵站、藝術中心大堂
網上睇： http://www.icoke.hk/
查詢：25820268/ http://www.hkac.org.hk