周末夜晚八方冇乜特別節目，去新伊館聽「我的香港夢」音樂會，現場有成2,000幾人，真係人山人海好熱鬧。二十幾間學校同團體幾百人登台表演，由毛孟靜同梁文道做主持，雖然冇紅歌星出場或者大唱時下hit歌，不過大家都聽得好感動，事關𠵱家好少機會幾千人為咗香港大合唱，仲要大家都渴望2012有普選，八方希望唔止在場幾千人聽到歌聲，最好北大人都聽到香港人對盡快普選嘅呼喚。
音樂會開場前，公民黨黨魁余若薇已經拎住個咪，不過佢唔係唱歌而係嗌咪，呼籲嚟聽音樂會嘅人簽名爭取2012普選，余大狀話香港人必須一條心，畀京官知道大家訴求，亦令煲呔冇得抵賴，拖拖拉拉唔肯落實普選，拎份綠皮書出嚟就蒙混過關。
「香港夢音樂會」由學者、社運人士組成嘅公民教育基金會主辦，搵咗陳日君樞機做贊助人，陳樞機話佢近日事忙，未有時間詳細睇煲呔炮製本政改綠皮書，未睇過都係唔講咁多；佢又講笑話自己唔係錢銀贊助人，只係「精神」贊助人。政協劉迺強日前指香港人上街係黑社會「晒馬」向北京施壓，好多人聽到好激氣，陳樞機就好幽默，話好開心見到咁多參加者支持2012有普選，相信大家只係想夢想實現，唔係「晒馬」。
希望皇后衞士唔好絕食
噚晚音樂會主題係半世紀香港夢，大唱過去幾十年金曲，樞機話自己嚟咗香港成60年，同好多香港人一樣希望香港好，7.1上街就係例子之一，佢話自己雖然係「出家人」，但都要關心社會，同老百姓企埋一齊，希望香港人人平安，安居樂業，追求人權、自由嘅夢想早日實現。「本土行動」成員絕食爭取保留皇后，陳樞機話支持所有為爭取理想付出代價嘅人，佢話唔希望絕食人士珍惜自己身體，唔好絕食。八方唔知絕食人士對樞機呼籲聽唔聽得入耳，希望無情政府唔好害死人。
音樂會搞手之一朱耀明牧師就話，過去幾十年香港有好大轉變，佢都見盡唔少人物升跌浮沉，亦目睹社會變遷，不過感到香港人有一樣嘢冇變過，就係追求自己嘅心願，大家都希望可能自由選擇生活方式、自由選擇領袖，希望呢一日快啲嚟到。