地產Ｌ以前做風扇起家，係風扇Ｌ嘅拍檔，後來拆檔，地產Ｌ改做地產，十幾年前就到樟木頭開發房地產，別人早去大陸搞地產，搞出大頭佛，出現唔少爛尾樓，地產Ｌ就一於低調經營，穩紮穩打，建立聲譽，以勤力取勝，唔淨止一早笑，仲一直笑到𠵱家。幾時笑，有學問。七月二十三日《蘋果》報道溫州一位先生教導子女有方，六位子女皆成材，在哈佛大學做教授。呢位先生叫做乜嘢名呢？好有意思，就係姓蔡名笑晚！英文諺語有云：thosewholaughlast,laughbest，笑得晚，笑得最甜。呢位蔡笑晚先生嘅父親，應該係有墨水之人，懂得做人道理，先至為兒子改名為「笑晚」！
地產Ｌ一早就笑，到𠵱家笑到好大聲㖭，已經減少工作量，交畀夥計做多啲。咁用啲空閒時間做乜？佢一講，幾乎嚇親左丁山，地產Ｌ話要競選做校友會主席喎，以後要出錢出力，為推進校友活動，發揚母校精神而努力。扶助在校同學為己任，佢肯出錢，係人都知，讀工管，做地產發大達之人，願意捐幾十萬畀母校研究香港本土歷史嘅，左丁山好少見，故此非常佩服，但估唔到佢竟然會出山競選做校友會主席咁大件事。
地產Ｌ計劃多多，組成強勁內閣，成員由六幾年至二○○六年嘅畢業生都有，文理社工商學院友齊全，實行老中青三結合，佢掹咗船務Ｃ，前董先生得力助手Ｔ以及保險Ｙ為副手，預備大搞。船務Ｃ讀經濟，從事航運發跡，每年捐錢畀母校搞中華美德教育，講儒家道理，崇敬先師錢穆、唐君毅，喺商界亦係少見。佢哋一位校友講：「讀文史哲難發達，故此新亞書院錢唐牟啲弟子只能著書立說，出錢推動歷史研究、美德教育嘅，就係工管系、經濟系畢業生，可見錢唐牟影響大得好緊要，發揮潛移默化作用。」今日新亞書院校友會開周年大會選新內閣，地產Ｌ之內閣好似係唯一參選嘅，如無意外，應該篤定當選，可喜可賀。