澳洲有對冲基金冧檔，又係因為花旗嗰邊啲次按問題，加埋私募基金籌唔到錢，投資者要求回報率越嚟越高，花旗股市點會唔受影響，前晚道指跌300幾點收市，睇個款絕對唔係借啲意，次按問題嘅影響已經唔係掛喺口邊嘅階段，已經對花旗經濟帶嚟實際嘅衝擊。
港股昨日跌641點，最多唔見咗成800點，收市跌幅雖然收窄咗，但係一啲都唔令人放心，成交1125億，大跌市嚟講唔係好兆頭。千祈唔好以為昨日咁跌只係期指結算逼近嘅關係，事關計埋昨日下跌，好友喺數字上仍有結算嘅優勢，如果有信心，晏晝嘅跌幅就冇理由擴大，如果昨晚花旗股市再大跌收市（絕對有咁嘅可能），咁樣下禮拜一港股就Noeyesee。
昨日港股仲係靠保險股頂住，但尾段都冇乜力，如果下禮拜連保險股都插埋，你話會點？兩大銀行公佈業績，會唔會頂得住？千祈唔好咁諗，花旗最大嗰間按揭公司連續3季業績見紅，滙控（005）點會樂觀，再加埋次按撥備，滙控會唔會俾人大插插，諗吓都心寒。不過，如果昨晚花旗股市反彈，下禮拜一港股早段有可能反彈，所以買P輪都係等吓先。
中行C輪9541：中行（3988）昨收4.02元，跌穿20日線，但靠近50日線承接嘅力度大增，「倒轉錘」形態係搵機會反彈，如果昨晚花旗股市反彈，下禮拜一可以買少少中行C輪9541炒轉短嘅，博正股上試4.20元，9541昨收20仙，正股升上4.20元，隻輪應該會喺28仙樓上，有4成升幅，正股跌穿3.94元止蝕。