出爐港姐冠軍、有「圓面黃宇詩」之稱的張嘉兒，上周六爆冷摘得后冠後，欠缺觀眾緣的她短短一周已引來劣評如潮，更被指是歷屆港姐中的「醜女極品」，無論網上甚至報章雜誌，均把其樣貌身材批評得體無完膚。其實過去不少港姐也曾遭炮轟，感同身受的向海嵐、莫可欣和楊婉儀等紛紛開腔力撐小師妹，大讚她獲獎實至名歸。
現年23歲的張嘉兒雖然穩坐港姐冠軍寶座，但其樣貌和身材卻成為眾矢之的，不但因闊臉被指酷似黃宇詩，有網友直指她比93年的莫可欣及86年的李美珊還要醜，又有指她貌似「一夜成名」的孔慶翔（WilliamHung），更過份的是，有網友把張嘉兒的頭key到垃圾桶上，令她猶如小露寶一樣，更指她跟垃圾桶同樣「外形圓渾」及「又肥又矮」。
張嘉兒雖然出身於有「港姐搖籃」之稱的加拿大英屬哥倫比亞大學（UniversityofBritishColumbia），前年參加溫哥華華裔小姐時雖然三甲不入，但也奪得「神采飛揚」豬肉獎。自信心爆棚的她再接再厲，今年5月底以過江龍身份參選港姐，由於樣貌平庸，參選初期已不被看好。
表現自信
泳衣問答環節高分
其實決賽當天，張嘉兒在問答環節中表現淡定，泳衣環節又取得33分，是得分最高的八位佳麗之一，僅次於得34分的季軍周美欣。晉身八強後她更添自信，在第二輪問答環節中綜合得73分排名第二，僅次於得80分的周美欣。
可惜張嘉兒爆冷勝出後，旋即成為箭靶，其實歷屆師姐莫可欣、向海嵐、葉翠翠和楊婉儀當選後，同樣面對外間的狂插，但她們都輕鬆面對，近日還異口同聲力撐師妹。
向海嵐前日力撐同是UBC出身的師妹張嘉兒，她在電話中說：「佢係我嘅心水，評判選出嚟一定有原因，佢係嗰啲越睇越有味道嘅人。冇人可以please（討好）全世界，佢要對自己有信心。」
楊婉儀則主張對惡評充耳不聞，她前日說：「我覺得張嘉兒幾靚吖，佢要記住評判眼光係雪亮，唔使理咁多評論，嚟參加得選美，都係對自己有信心，佢𠵱家只要做好工作，最終大家會發現佢係一個完美嘅人。」
莫可欣也不認同外間對張嘉兒的狠批，她昨日在電話中說：「我覺得選美嘅嘢各花入各眼，評判選得出嚟一定有佢嘅原因，我梗係要幫佢平反，唔單止舉手支持，仲要舉埋腳撐佢㖭。我相信佢對自己嘅美貌都會有信心，呢啲批評咪當做一個鍛煉，捱過咗對佢將來好有用。」
近日被指整容的葉翠翠也非常同情張嘉兒，她說：「希望大家對佢手下留情，我接觸過佢本人，佢講嘢好有內涵，我覺得佢個樣好似林嘉欣㗎，係有少少babyfat啫，但佢仲年輕，大家要畀時間佢證明出嚟。呢行太多流言同是非，要一笑置之。」
師姐力撐
「吹咩，佢真係贏咗」
至於一向敢言的袁彌明，前日也在電話中為張嘉兒辯護說：「其實我之前喺blog貼佢係冠軍人馬，好多網友淨係睇樣同身材，我審美係會睇埋裏邊，最初睇佢個個人履歷，知道佢喺加拿大返嚟，識英文已經對佢有好感，睇佢寫嘅文字仲知佢係有內涵。」能否向張嘉兒提供一些應對方法？袁彌明說：「佢唔需要大家同情，外間踩佢都冇用，吹咩，佢真係贏咗喎，佢呢刻只要有自信，唔需要理網上討論區講嘅無聊嘢。」
此外，張嘉兒昨日和港姐亞軍王君馨及季軍周美欣到銅鑼灣六福珠寶，領取價值共180萬的后冠及鑽飾。提到有網友狠批其樣貌似WilliamHung，會否感到受侮辱及打擊時，張嘉兒說：「初初都有唔習慣，第一次接受呢啲批評，對我嚟講係挑戰，我會做好本份。我會相信自己，視呢啲批評為推動力，每個人眼光唔同，評判選得我，我都會對自己有信心，不過都驚屋企人會擔心我會唔開心。」
至於有指TVB內定冠軍人選，港姐副統籌經理陳紫蓮即在一旁搶答說：「TVB冇理由內定，要捧一個人可以名正言順，唔需要安排一個人去選美，有雜誌登咗當晚嘅分紙，有兩張都唔係張嘉兒嘅。」
採訪：卓美娟、比華利
攝影：陳偉權
全方位品評
街訪：老外一致讚OK
中國人看中國人，審美眼光有一定的準則，但來自溫哥華的張嘉兒，在老外眼中又是否美女一名？
最高蘋嬸
我希望港姐冠軍張嘉兒可以喺07年帶領闊面潮流，等人知道瓜子面已經唔興㗎嘞，就算去餐廳都要食闊麵，唔食幼麵。闊面萬歲！Yeah！
蘋果娛樂特派評述員蘋嬸
