蕭定一嘅美容公司前晚又搞新噱頭，喺中環一間酒吧搞咗個打Botox派對，並安排整容3嬌甄穎珊、陳樂榣同埋石詠莉以超低胸嘅性感護士裝到場，不過現場就混亂非常，傳媒加埋自由行遊客幾十人喺條德己立街度迫，結果大會搵咗啲鐵欄擺正喺條街上分隔遊客同藝人，不過因為佢哋事前冇申請，最終有人報警投訴佢哋阻街。
兩個警察到場了解過事件後就要大會搬走啲鐵欄，令現場更加混亂，蕭定一到場被問到安排混亂，佢顯得一副事不關己咁話：「係咁㗎喇，係企街㗎喇。」令現場記者更加鼓譟。
束腰裝唞氣難
整容3嬌着得好低胸，大騷加建後嘅身材，吸引唔少遊客圍觀，仲不時對住佢哋嘅身材指指點點，又面露微笑，但有口痕友話：「都唔知邊個嚟？」石詠莉就話件束腰護士服令佢唞氣好辛苦，問到陳樂榣會唔會擔心俾人博懵，佢話：「都有少少驚。」石詠莉就話：「如果真係有色狼侵犯佢，我會打個色狼。」問到佢哋着護士服，唔驚俾護士投訴影響形象，甄穎珊話：「我哋嘅觀眾唔係病人，唔驚。」
