今屆港姐三甲選出後，冠軍張嘉兒被批評得體無完膚，指她闊面醜樣，更被稱為圓面黃宇詩。昨日當圓面黃宇詩遇上正版黃宇詩時，二人樣貌不相伯仲，當然黃宇詩也大讚對方靚女，而張嘉兒接受電台訪問時，提到不少無綫工作人員支持她，一度感動嗚咽。
應屆港姐冠軍張嘉兒、亞軍王君馨及季軍周美欣，昨日先後到旺角和銅鑼灣領獎，被指與冠軍張嘉兒相似的黃宇詩，擔任手錶頒獎禮司儀，當有「圓面黃宇詩」之稱的張嘉兒跟正牌黃宇詩同場時，即被要求合照，兩人樣貌不相伯仲，但張嘉兒表現尷尬，被問到可覺得與對方相似，她回應說：「我覺得大家都好好。」
「我同佢面型似」
反而黃宇詩則出手為張嘉兒擋駕，她說：「我同佢面型有啲似，佢好淡定又大方，我自己就蠱惑啲。其實嘉兒係一個靚女，只不過唔係好有商業元素嗰種。不過見到有人同自己相似感覺好得意。」
由於張嘉兒自爆冷奪冠後，被批評樣醜報道如雪花飛，日前她接受商台錄音訪問時，一直EQ甚高的她，對於負面報道聲稱不受影響，但當談到無綫的工作人員十分支持她時，即感動得嗚咽起來，她說：「報道出咗，我係最擔心屋企人，因為怕佢哋睇完唔開心。選完之後，第二日見番工作人員，佢哋拍一拍我手支持我，大家冇親戚關係，但佢哋都擔心我，真係好感動好開心，王君馨同周美欣都叫我唔好理。」
「過咗呢關就得」
張嘉兒當選後，有人向廣管局投訴謂賽果不合理，她說：「我都想了解件事，呢個係代表一部份人嘅意見，做藝人唔一定個個都鍾意自己，最重要係相信自己，我係覺得啲人鍾意批評別人，其實點解唔可以講人好嘢，係要講人哋唔好。」
此外，陳志雲昨日於數碼港錄影《志雲飯局》，提到張嘉兒被批評醜樣，陳志雲稱：「對港姐係一大考驗，過咗呢關就冇嘢難到佢哋。」至於亞軍王君馨被揭把穿上魚網絲襪的「趷籮」冶艷照，以及跟友人伸脷照放到交友網站myspace，供諸同好，陳志雲對此認為沒有問題，他說：「觀眾大反應話佢哋醜，可能係選出嚟嘅港姐同觀眾心目中有唔同，所以先有咁大反應。」而王君馨昨日領獎時對於報道回應說：「我同另外兩個台灣隊員係高中同學，大家一齊唱歌跳舞組成SevenXpress，成日都參加啲社區同慈善表演。」
採訪、攝影：王連連、何永寧、藍文浩
